Dakong sunog miigo sa siyudad

Dakong sunog milamoy sa sobra upat ka mga sitio diha sa barangay Pahina-Central luyong bahin sa South Bus terminal diin nag-abot gyud ang kalayo gikan sa dalan N.Bacalso ngadto na sa pikas sa dalan Sancianko kagabii diin diha ra sa luyong bahin mismo sa may Pahina Central Fire Station.

Miulbo ang maong sunog sugod alas 6:08 sa gabii apan gumikan sa kalit nga pagdako sa kalayo giisa kini ngadto sa general alarm hangtud nga napawong kini gibana-banang duha ka oras kapin gikan sa pagsugod niini.

Gawas sa tanang fire sub-stations dinhi sa Cebu City Bureau of Fire Protection ang mga silingang kabomberohan gikan sa Talisay, Mandaue, Liloan, Lapu-Lapu, Consolacion ug uban pa lakip na sa mga Filipino-Chinese fire brigade miasdang sa alarma.

Si Cebu Fire Marshal Supt. Esmael Codilla sa pakighinabi sa mga tigbalita sa fire scene kagabii nagkanayon nga naglisod sila sa pag-atraka sa sulod gumikan sa mga sementadong kural ug piot kaayong agianan nga dili gani masudlan og duha ka tawo.

"Lisod pag-contain ang kalayo daghan kaayo ang obstruction, lisod kaayo ang pag-confine sa kalayo unya light materials pa gyud kadaghanan ," asoy pa ni Codilla.

Usa sa nakadungag sa problema sa kabomberohan mao ang pagkusog sa hangin nga mipadulong ngadto sa ubang kabalayan sa sulod diin malisod na ang pagplastada sa ilang mga kahimanan.

Atol ning pagsuwat sa balita padayon pang giimbestigahan sa kabomberohan ang hinungdan sa sunog apan sumala pa sa mga molupyo sa sibyaanan DYSS diha magsugod sa payag-payag sa usa ka Ernesto Pondales ang kalayo apan wala pa kini ikumpirmar sa kabomberohan.

Daghang mga residente ang mireklamong nakawatan apan usa sa mga nangawat kulatadong nabalhog sa selda.

Si Mayor Tomas Osmeña uban sa mga lokal nga opisyal sa dakbayan misusi sa dapit.

Adto nagdasok ang mga biktima sa Pahina-Central Sports Complex, Barangay Hall ug Barangay health clinic ug ang uban diha na sa kalsada nagpahimutang.