Peras ikiha sa CH

Nagtinguha nga mopasaka og kaso ang kagamhanan sa siyudad sa Sugbo batok kang RTC judge Soliver Peras gumikan sa gipakanaog niining desisyon nga nagmando pagpaabli sa South Coastal Road sa South Reclamation Project (SRP).

Gibutyag ni Acting City Attorney Rodulfo Golez nga kini tungod sa giluwatang preliminary injunction nga nakapugos kang Mayor Tomas Osmeña pagbukas sa SCR nga dili na magkinahanglan pa og SRP pass.

Alang kang Golez kasong administratiba tungod sa "arbitrary injunction without proper hearing ang isang-at nilang reklamo batok sa huwes ngadto sa Korte Suprema.

Giklaro ni Golez nga gitun-an pa sa mga abogado sa City Attorney's Office ang maong kaso nga isang-at nila kang Peras.

Hinuon gipasalig ni Golez nga motambong sila sa hearing sa giluwatang injunction sa SCR sa Nobiyembre 17 ug 24 aron obserbahan kun unsay himuon sa huwes atol sa maong hearing.