Bad policemen target ni Loot

Mga police scalawags sa han-ay sa Cebu Provincial Police Office dili lang gustong ilabay ni CPPO Director Vicente Loot kundili tangtangon gyud sa serbisyo ug pasakaan pa og kasong kriminal.

Si Supt. Loot sa pakighinabi sa Banat News kagahapon nagkanayon nga iya gyung gikalipay nga naanam nag kasikop ang mga badlungong polis sa CPPO.

Matud pa niya bisan pipila lang ka porsiyento sa iyang mga sakop ang nagpabadlong apektado ang kinatibuk-ang organisasyon sa kapolisan dili lang ang mismong scalawag nga polis.

Namatikdan ni Loot bisan makadaghan na niyang gipangbalhin sa nagkalain-laing lungsod kining mga scalawags magpabadlong lang gihapon sa bag-ong assignment. "Police with criminal minds" maoy iyang paghulagway sa maong mga polis.

Mitug-an si Loot nga kaniadto pa duna na siyay listahan sa mga badlungong scalawags nga nahatag na didto sa National Bureau of Investigation (NBI) ug Regional Intelligence and Investigation Division (RIID) aron magpatabang og panakop sa mga polis nga nagpakabuhing kriminal.

Namatikdan ni Loot nga kasagaran sa mga polis nga badlongon nga naa sa iyang listahan naa madestino sa mga kalungsuran duol sa Metro Cebu kun "urbanized areas." Pipila sa iyang gibutyag mao ang police stations sa Compostela, Consolacion, Liloan, Talisay City, San Fernando, Minglanilla ug Carcar.

Sigun pa ni Loot kasagarang binuang giapilan sa mga polis sa listahan naglangkob sa: protektor sa drug activities ug illegal gambling (video karera), hantak, tigbakay diin iyang nahibaw-ang mao pay mangunay og himo'g mga ruwedahan diha sa ilang mga lugar.

"Ang atong objective mao ni, never mind kung gamay ang ebidensyang makuha basta ang atua madakpan kining mga police scalawags, maayo na gani kay dunay mga mibarog batok kanila kay kasagaran wala may moreklamo maong magpatuyang lang sila og himog binuang,1 to 2 percent lang ni sila pero ang ilang damage 100 percent sa organisasyon," sigun pa ni Loot.

Pipila palang ka adlaw duna nay upat ka mga sakop sa CPPO gikan sa nagkadaiyang lungsod nga gipangreklamo ug nangaaktuhan sa paghimo og binuang, dunay nalambigit sa sindikato sa mga mangingilad, dunay gipasanginlang nangilkil, dunay giingong nagtinapulan sa pagtubag sa alarma kay di paistorbo sa pagkatulog diha mismo sa police station, dunay gipasanginlang nangilkil ug kagahapon sa kadlawon duna na say duha ka polis ang gilambigit sa binuang sa pasangil nga sila mga protektor sa iligal logging.

Sumala pa ni Loot nga una niya matabangag limpyo ang komunidad iya unang limpyuhan ang iyang ginsakupan aron walay ika-istorya ang katawhan.