Laing balay-patigayon gipasirad-an sa city hall

Laing balay-patigayon dinhi sa dakbayan nga nasakpang migamit og peke nga business permit gipatak-opan sa mga sakop sa revenue task force kagahapon sa buntag.

Ang Banilad Auto Parts nga nahimutang diha sa barangay Banilad nga gipanag-iya sa negosyanteng si Anson Uy namatud-an nga migamit og orihinal nga porma sa business permit apan nasuta nga pulos gimaomao ang mga pirma niini hinungdan nga gi-rekomendar kini ni Mayor Tomas Osmeña nga pasirad-an.

Ang mga sakop sa Revenue Task Force pinangulohan ni Cristopher Ong maoy nipatuman sa pagsira sa maong establisamento inabagan sa mga polis ug mga sakop sa media.

Apan si Uy dali gilayong nakigkita ngadto kang Nanette Sungahid ug gi-presentar niini ang kamatuoran sa iyang resibo sa gihimong pagbayad sa pag-process niya sa business permit.

Iyang gitug-an nga wala gyud siya masayod nga peke diay ang mao niyang permiso nga nakuha gumikan kay sulod sa upat ka tuig na niyang pag-operate iyang gitug-an nga karon lang siyang tuiga nabiktima sa maong peke nga permit.

Mipasalig hinuon si Uy nga makig-alayon siya ngadto kang Osmeña ug mipasalig nga mo-execute og affidavit aron pagmatuod nga inosente siya sa maong pag-peke sa iyang permit aron usab ma-ablihan og balik ang iyang patigayon.

Apan iyang gitug-an nga gibati gyud siya ug kahiubos ilabina kay gi-ubanan pa sa mga polis ang pagpasira sa ilang establisamento nga gihulagway niya nga na-uwawan gyud sila nga nasusama na hinuon og kriminal.