Yu murder: Polis blanko pa gyud; P100 mil reward sa makatudlo

Kagamhanan sa dakbayan sa Mandaue ug Mandaue City Chamber of Commerce and Industry (MCCI) mitanyag og P100 mil nga ganti alang sa dinaliang pagkasulbad sa kaso sa Wilson Yu murder.

Ang ganti itugyan ngadto sa si bisan kinsang tawo nga makahatag og impormasyon kalabot sa tulo ka mga suspek nga mibanhig sa biktima niadtong nakabalay'ng adlaw diha sa M.L. Quezon barangay Casuntingan sa naasoy'ng dapit.

Ang P50 mil niini maggikan sa panudlanan sa dakbayan sa Mandaue nga hangyuon ni Mayor Teddy Ouano sa konseho samtang ang laing P50 mil gikan sa MCCI pinanguluhan ni Eric Mendoza ang presidente sa maong kapunungan.

Kini maoy nakab-ot sa panagtagbo sa MCCI, Mandaue City Police Office nga girepresentahan ni Supt. Emmanuel Ughoc, ang deputy director sa MCPO ug Ouano kagahapon.

Malaumon si Mendoza nga dako ang matabang sa maong ganti aron matumbok si kinsa ang mga responsable sa pagpamanhig.

Nunot sa insidente gipangusgan karon sa kagamhanan sa Mandaue nga himuong category A gikan sa category C ang MCPO susama sa Cebu City Police Office.

Matud pa ni Ouano kun mahimong category A ang MCPO motaas ang gidaghanon sa kinahanglanong polis sa dakbayan hayan nga mahimo na silang modugang og mga polis ug mga kagamitan alang sa law enforcement.

Ang Mandaue City maoy giisip nga highly industrialized ug urbanized city dinhi sa Metro Cebu gumikan sa kadaghan sa mga pabrika ug mga dagkong balay patigayon ingon man populasyon kun itandi sa dakbayan sa Sugbo.

Si Yu kinsa supporter ni Presidente Gloria Arroyo niadtong nakalabay'ng piniliay sa 2004 gibanhigan samtang nagluwan sa iyang awto namatay diha na sa tambalanan gumikan sa daghang igo sa lawas niini. Subay sa pasiunang imbestigasyon 20 minutos nang nagpaabot ang mga suspek sa maong dapit.

Si Sr.Supt. Pablo Lamosao ang MCPO director miangkon kagahapon nga nag-atubang pa sila sa "blangkong paril" sa pagkakaron gumikan kay wala pay nakuhang mga mahinungdanong pamahayag gikan sa mga kabanay sa biktima.

Gihangop usab ni Lamosao kun dunay mga eksperto gikan sa Police Regional Office 7 ug Kampo Crame nga motabang sa imbestigasyon aron madali ang kasulbaran sa kaso.

Si Yu naila sa katilingban sa iyang natampo sa komunidad isip aktibong miyembro sa mga kalihukang sibiko ug nahimo usab siyang tsirman sa Kiwanis Club kaniadto.