Motorista, iyang motor nahulog sa 50-tiil bung-aw

Nabalian sa bukog ug nakaangkon og mga bun-og sa lawas ang usa ka drayber sa motorsiklo human kini mahagbong uban sa iyang gimanehong motorsiklo ngadto sa bung-aw diin adunay 50 ka tiil nga gilawmon kagahapon sa kaadlawon diha sa Sityo Tangub barangay Lagtang dakbayan sa Talisay.

Ang biktima naluwas sa kamatayon tungod kay nasangit kini sa usa ka punoan sa kahoy apan puwerteng gubaa sa motorsiklo niini tungod kay milahos gyud kini ngadto sa ubos.

Ang biktima mao si Felicisimo Miro taga barangay Awihaw dakbayan sa Toledo kinsa duha ka oras nga mikamang og nagkapyot-kapyot sa bagon sa maong lugar para makasaka kini pagbalik sa karsada. Si Miro mideretso ngadto sa balay ni barangay kapitan Celiapo Cabuenas pagkasaka na niini og balik sa diha sa karsada aron mangayo og tabang.

Base sa taho nga si Miro nagbiyahe sa maong lugar paingon mopauli sa Toledo aron maghatod og tambal sa iyang asawa nga dunay sakit.

Mi-overtake si Miro sa dumptruck nga nag-una kaniya diin wala niya mabantayi nga diha na siya sa ngilit sa karsada tungod sa kangitngit sa palibot.

Ang motorsiklo ni Miro nga dunay numero sa plaka EA- 5539 tua karon sa barangay hall sa Lagtang diin ang mga tanod na maoy miugkat niini gikan sa bung-aw.