Nasayran gikan ni SPO2 Rolito Jumao-as sa pakighinabi sa Banat News nga sa wala pa mahitabo ang maong insidente nagka-engkwentro sila sa suspetsado nga si Juon Yong Gu alyas Gopy nga iya ra usab nga boardmate sa maong yunit.
Sa dihang naabot ang kapolisan sa maong lugar ilang nabantayan nga abri na ang bag sa biktima diin gibutyag sa katabang sa mga Koreano nga si Pacita Meomeo nga taga Carmen, Bohol nga ang maong bag maoy butanganan sa kuwarta sa biktima.
Hinuon dili pa masuta sa kapolisan nga kawat ang motibo sa maong pagpatay kay dili pa sila makasulti kun nakuhaan ba ang kuwarta sa maong biktima.
Matud pa ni SPO2 Jumao-as nga ang maong katabang nakakita gayud sa tanang panghitabo apan dali lang nga misibat ang suspetsado ug karon padayon pa nga gipangita sa kapolisan
Sa laing bahin, usa usab ka lalaki ang napalgang patay diha sa Sitio La Salle, Barangay Mactan sa mao ra nga syudad.
Giila ang biktima nga si Reynaldo Costelo, 30, ulitawo ug molupyo sa mao ra usab nga lugar.
Napalgan ang biktima nga wala nay kinabuhi ug nakaangkon kini og mga samad dinunggaban sa iyang lawas.
Nasayran sa imbestigasyon sa kapolisan sa maong siyudad nga ang biktima usa ka ilado nga kawatan ug drug user.
Si Ceasar Aying, subpoena server sa Barangay Mactan mao ang nakakita sa lawas sa biktima niadtong Martes sa alas 8 sa buntag ug maoy misumbong ngadto sa mga awtoridad.
Padayon pa gihapon ang kapolisan sa ilang imbestigasyon sa maong kaso ug hangtod karon wala pa silay matumbok nga suspetsado sa maong pagpamatay.