Milikay sa away naligsan, patay

Usa ka tawo nga midagan kay naglikay sa naggukod niining mga tawo nga iyang gikaaway naligsan hinuon sa D'Rough Rider bus ug namatay.

Ang aksidente nahitabo alas 4:30 ang takna sa miaging kaadlawon didto sa Cotcot, Liloan, Cebu.

Ang biktima nga si Jordan Sadual, 25 anyos, minyo nga nagpuyo sa sitio Tulay sa barangay Cotcot sa nahisgotang lungsod nakabaton gyod og grabeng kadaut sa lawas.

Gimaneho ni Santiago Orio Arellano, 39 anyos, minyo nga nagpuyo sa Tabuelan, Cebu ang D' Rough Rider bus nga sakyanan nga nakaligis patay sa biktima.

Si P01 Nicalvero Valbestre sa traffic section sa kapolisan sa nahisgotang lungsod nga maoy nag-imbestigar sa maong hitabo miingon nga nag-inom ang biktima sa usa ka tindahan sa maong dapit.

Sumala pa ni Valbestre nga mitumaw ang panaglalis batok sa wala pa mailhing mga tawo kinsa buot nga mohamag sa pagkulata ni Sadual hinungdan sa pagkaratil niini og dagan.

Apan dugang pa niya nga gigukod ang biktima sa mga tawo nga gikaaway niini hangtod nga milabang kini sa pikas habig sa karsada ug naligsan sa bus nga tulin nga nagdagan paingon sa dakbayan sa Sugbo.

Dugang pa ni P01 Valbestre gihatod unta ang biktima sa tambalanan apan ang mga doktor nga nag-atiman niini mideklarar niya nga patay na kining nahidangat kanila.

Ang drayber nga nakaligis sa biktima ang mitahan sa kapolisan sa maong lungsod ug temporaryo kining gitanggong sa bilanggoan.