Tabang alang sa gihulga sa NPA

Bohol - Nakig-alayon karon ang kadagkuan sa militar nga nagbase ning probinsya ngadto sa nagkalain-laing nasudnong ahensya sa kagamhanan aron sa ingon mapalapad ang ilang paghatag sa serbisyo ngadto sa mga lugar nga giingon nga gihulga ang kahusay ug kalinaw sa mga rebeldeng New People's Army kon NPA.

Si Gobernador Erico Aumentado miingon nga mao kini ang pahibawo kaniya sa kadagkuan sa militar nga miingon nga kini usa sa mga paagi aron sa ingon magpabilin ang kamalinawon sa probinsya.

Giangkon sa gobernador nga adunay daghang mga lungsod sa probinsya sa pagka karon giingon nga maoy gihimong basi sa operasyon sa mga rebeldeng NPA.

Matud pa ni Aumentado nga gkinahanglan gayod nga adunay dinalian nga aksyon nga ilang mahimo kalabot niini.

Nagkanayon si Aumentado nga dako og ikatabang ang nagkalain-laing ahensya sa kagamhanan kalabot niini.

Midugang ang gobernador usa niini mao ang pagpakita sa katawhan nga maayo ang ilang pagsebisyo kanila.

Sa maong paagi dili sila madala sa mga pangilad sa mga NPA batok sa dili maayong pagdumala sa kagamhanan.