Diver nalumos

Usa ka diver og mga kinhason diha sa lungsod sa Madridejos gituohang nalumos ug namatay human kini makit-i sa iyang mga kaubanang mananalom nga naglutaw diha sa usa ka gamay'ng isla sa naasoy'ng lungsod.

Wala nay kinabuhi nga nadangat sa lokal nga tambalanan ang biktimang si Leuterio Abais,52, minyo ug molupyo sa Barangay Bunakan sa naasoyng lungsod.

Sumala pa sa midangat nga report diha sa Cebu Provincial Police Office ang biktima uban sa laing mananagat nga sila si Victoriano Despe Sr. , Anthony Cobar, Victoriano Despe Jr. ug Jovy Valencia miadto sa Tanguigue Islet sa naasoy'ng barangay aron manguha og kinhason.

Gumikan sa kalawom sa maong lugar gikatahong migamit og compressor ang biktima ug mga kaubanan aron makasustinir og hangin sa ilawom samtang nanguha sa mga kinhason.

Apan ang nahibilin sa bangka nga si Valencia gikatahong nakakita kang Abais nga milutaw sa dagat nga daw nawad-an sa panimuot, dangtan ug taud-taod kalit kining mitidlom pagbalik.

Dangtan usa ka oras nga pagpangita sa mga kaubanan wala gyud makit-i si Abais hangtud nga milutaw lang kini sa dagat maong ila kining gidali og dala sa tambalanan apan gideklarar nga patay na kini.