Opisyal sa crime laboratory mipasalba sa tiil sa kauban

Opisyal sa PNP Regional Crime Laboratory 7 gireklamo sa iyang kaubang opisyal ra usab sa maong buhatan dihang gipabuthan sa nag-una gumikan lang sa lamesa niadtong nakalabay'ng Lunes sa hapon diha mismo atubangan sa ilang buhatan sa Camp Sotero Cabahug.

Ang gireklamo mao si Chief Insp. Alex Uy ang medico legal officer sa PNP Crime Lab-7 kinsa gipasanginlang mipasalba sa iyang armas diha duol sa tiilan ni Sr. Insp.David Alexander Patriana kinsa opisyal usab sa PNP Crime Lab-7.

Si Patriana misumbong sa sikbit nga buhatan diha sa Criminal Intelligence and Detection Group 7 sa hitabo.

Sumala pa ni Patriana nga gipatawag siya sa ilang director nga si Sr.Supt. Myrna Areola ug mimando kaniya nga ipakuha na ang iyang mga butang diha sa Medico Legal Office nga naa gibutang sa mga hunos sa lamesa didto.

Dihang padulong na siya gawas nasugatan niya si Uy ug gipangutana niya nganong wala na lang siya direktang gisultihan niini kalabot sa maong lamesa, nianang tungura gikatahong kalit siyang gipangutana ni Uy og "nagdadabog kaba?" nga iya usab gitubag og "Oo, bakit?"

Nianang tungora giingong kalit gibunot ni Uy ang iyang armas ug gition ngadto kaniya dayong pasalba diha sa tiilan ni Patriana, si Patriana giingong milakaw nalang padulong sa buhatan sa kaubang opisyal apan giingong gisundan siya ni Uy ug gipugngan ang abaga niini hinungdan nga iya kining gisukmag.

Si Areola sa pakighinabi sa mga tigbalita nagkanayon nga iyang paimbestigahan ang insidente ni Chief Inspector Zosimo Doyugan sa Internal and Legal Affairs Section aron kahimuan og angayang kasong ipasaka batok nilang duruha