SoKor police makig-alayon sa PRO-7 para sa training

Kapolisan sa nasud sa South Korea ug Police Regional Office 7 milagdag kasabutan tali sa duha ka mga nasud aron palig-unon ang seguridad ug pagbansay-bansay sa tagsa-tagsa nila ka mga sakop.

Si PRO7 Police Director Eduardo Gador nagkanayon nga si Senior Supt. General Sun Ho Cho ang Commissioner sa Chungnam Police Regency of the Republic of Korea mibisita niadtong Martes sa iyang buhatan ug nagkalagdaay sa Memorandum of Agreement.

Ang MOA naghisgut sa pagbinayluay ug paghinatagay og impormasyon nga makaapekto sa kalinaw ug kahapsay nga makaapekto sa duha ka nasud ug pagpadala og mga polis didto sa South Korea aron magbansay ug mao usab ang buhaton sa mga Koriyanong polis nganhi.

Matud pa ni Gador dugay nga giimbitar sa Chungnam ang kapolisan dinhi sa nasud sa pagbisita sa ilang lugar apan wala gyud kini atimana gumikan sa pagdaginot sa gobiyerno.

Ang nasud sa Korea maoy tubdanan sa kinabag-ang duot sa mga turista nga manganhi dinhi sa Central Visayas maong usa sa mga katuyuan sa delegado sa Chungnam mao ang pagsegurong protektado ang ilang mga kababayan dinhi, samtang si Gador miingon nga susama sad nila daghang mga Pilipino didto sa Korea.

"There are many Koreans in Central Visayas so they would like to protect their nationals here.Atol sad daghang mga Pilipino didto so we can now easily keep in touch with them if we have problems," asoy pa ni Gador.

Samtang si Acting Cebu City Police Director Melvin Gayotin kinsa gibisita sa mga Koriyano nagkanayon nga gidayeg ang CCPO gumikan sa ideya sa Bus-Bust Operation nga mga mobile police stations sa dakbayan nga gibutang sa mga dapit diin sagad dunay mahitabong krimen.

Gipaabot nga dunay mga donasyon ang Chungnam Police sa CCPO sanglit usa sa tuyo nila dinhi mao ang pagsusi kun unsay ilang mga nakitang gikinahanglan sa kapolisan.

Samtang kagahapon usab nanumpa ang 232 ka mga bag-ong police recruits sa PRO7, 190 nila mga lalaki, ang maong gidaghanon kulang pa og 18 sanglit 250 ang gikinahanglan sa PRO7.