PSG hubog, nakabangga

Sakop sa Presidential Security Group gidakop human makabangga og duha ka sakyanan gumikan sa kahubog ug walay lisensya nga nagmaneho diha sa dalan Magallanes ug Lapu-Lapu St. ning dakbayan sa milabay'ng gabii nga nakaingon sa pagkaangol sa lima ka pasahero sa PUJ.

Ang mga nasikop giilang sila si S/Sgt. Richard Josol,33, ug nadestino sa 3rd Guard Company sa Presidential Security Group nga maoy nagbantay sa Malacañang sa Sugbo ug kauban niining si Roque Raniola.

Sigun pa sa kapolisan unang naatrasan sa Isuzu Trooper nga gimaneho ni Josol ang usa ka Fuso Fighter truck van nga may plakang GWA-229 nga gimaneho ni Raymund Totoy diha sa may Plaza Independencia apan wala kini mohunong ug mipasutoy hinuon paikyas apan nakaigo nasad og laing PUJ nga nakaingon sa pagkaangol sa lima ka mga pasahero diha sa dalan Lapu-Lapu.

Ang PUJ driver nga si Reneboy Linos,39, taga Barangay Apas nakurat na lang sa hitabo kay miikyas gihapon ang duha maong gigukod kini sa ubang mga motorista ug mga polis gikan sa Waterfront Police Station, didto na kini madakpi sa Gonzales St. eskina Legaspi gumikan kay mibuto na ang ligid niini sa atubangan.

Giingong ang lima ka mga pasahero nakaangkon og mga bun-og sa kalawasan ug ingon man kadaut sa duha ka mga sakyanang ilang nadasmagan, ang duha positibong nakainom base usab sa gihimong paghiling sa Cebu City Medical Center.

Ang PSG Commander sa Malacañang sa Sugbo nga si Capt. Jason Saldua nagkanayon nga iya nang gibutang sa camp restriction si Josol samtang himuon pa ang imbestigasyon sa kaso.

Samtang nasuta nga ang sakyanang gigamit sa duha iya sa Cebu Customs ug may pagtugot ni Collector Maria Lourdes Mangaoang sanglit gihulman kini ni Presidential Assistant for Central Visayas Felix Guanzon aron gamiton sa pag-abot ni Presidente Gloria Arroyo niadtong Martes.