Ilog sa GRO, usa namatay

Gumikan sa panag-ilog sa seksing GRO usa ka lalaki ang napatay samtang grabeng naangol ang kauban niini dihang sila gipanunggab sa grupo sa mga batan-on sulod sa usa ka karaoke bar sa Sitio Humay-humay Barangay Pajo dakbayan sa Lapu-Lapu kagahapon sa kaadlawon.

Patay nang midangat sa tambalanan si Pyrmidson Melendrez,25, taga Compostela ug grabe sad ang kauban niining si Allan Jayme,25, ulitawo taga Cogon West, lungsod sa Carmen kawani sa Shangrila Hotel sa Mactan .

Sumala pa sa imbestigasyon sa kapolisan gikan pa mitambong ang duruha uban sa iyang grupo sa ig-agaw ni Melendrez nga nagsaulog og birthday ug gikan didto midiretso sila sa karaoke bar sa maong dapit.

Apan giingong pag-abot nila didto gidugok sila sa mga babayeng gikan pa naglingkod sa lamesang dunay mga kustomer ug didto na milingkod sa ilang lamesa, namatikdang dunay tulo ka wala mailhing mga lalaki nga gibiyaan sa mga babaye ang migawas.

Dihang miabot ang giorder nga beer sa mga biktima kalit nga mibalik ang tulo ka lalaki og gikuha ang mga beer nga giorder dayong hampak niini kanila ug gidunggab ang buak nga botelya diha nila.

Gikatahong nakabsan sa iyang kinabuhi una pa makaabot si Melendrez samtang grabe si Jayme. Wala na maabti sa kapolisan ang mga suspek .