2 polis mihagbong sa giatake ilhan, ipa-imbestigar

Pa-imbestigahan ni Acting City Police Director Melvin Gayotin ang alegasyon sa usa ka Benjamin Dublin nga giingong gikulata ug gihagbong sa patrol car sa duha ka mga sakop sa Mobile Patrol Group niadtong Sabado sa hapon.

Si Gayotin miila sa duha ka mga polis nga mao sila si PO3 Dominador Apa ug PO1 Lyle Allen Saunoy sakop sa MPG ug maoy giingong mihatud sa biktima.

Sa entry nga nakuha sa Banat News pinaagi ni Christian Luga sa Hotline 166 nagkanayon niadtong Sabado alas 6:35 sa hapon nakadawat og "sick person alarm at Cinema -Colon for conduction to hospital" ang ilang buhatan ug ang car 238 sa MPG nga gimaneho ni Eric Veloso kauban ang duha ka polis maoy mitubag niini.

Pagka-alas 6:56 sa samang adlaw sa entry sa Hotline 166 giingong gitala ang follow up report sa car 238 nga nag-ingong " properly conducted to T.Padilla" sumala pa ni Luga.

Apan niadtong Domingo ang biktima nakaplagan sa mga molupyo diha sa may tulay sa Tejero nga nagkalapok ug gihatud didto sa Cebu City Medical Center. Si Chief Inspector Claro Benatiro kinsa paryente ni Dublin maoy mitug-an sa Banat News nga namasangil si Dublin nga gikulata siya sa duha ka polis imbes nga dad-on sa CCMC gumikan kay giatake kini sulod sa sinehan.

Si Gayotin sa iyang bahin kun dunay sakit ang usa ka tawo adto sa tambalanan ang punta niini, apan kung kadudahan man ugaling o dili ba kaha hubog niadtong higayuna si Dublin didto angayan sa police station kini dad-a.