Ika-87 gitumba sa vigilante sa Colon

Ika-87 nga biktima sa gidudahang mga vigilante gihubon og pusil sa ulo patay diha sa atubangan sa sapatusan sa dalan Colon Barangay Kalubihan ning dakbayan kagahapon sa hapon.

Patay ug nagkaob diha sa ganghaan sa maong tindahan ang biktimang si Richard Abalo, hingkod ang panuigon, giingong "manguwartahay" ug dispatser sa maong dapit ug nagpuyo sa dalan Garfield Barangay Pasil ning dakbayan.

Si Abalo giingong nasulod na sa Bagong Buhay Rehabilitation Center gihulagway sa iyang uyuang dili buot magpaila sa pangalan nga mag-istambayan ang biktima diha sa Colon ug bisan asa lang kini magpuyo.

Duha ka mga dagkong tawo nga luwan sa usa ka DT motorsiklong walay plaka ang gitumbok nga miduol sa biktima samtang kini nagbarog sa ganghaan sa sapatusan.

Sigun pa ni Tessie Campus usa ka vendor sa maong dapit nga gikahinabi sa Banat News nga nakakita siyang nakig-istorya ang biktima sa wala pa ang hitabo sa usa ks Ruben Nobleza kinsa dali usab nga nakadagan palayo.

Gituohang gidul-itan kini og pusil diha sa hubon ang biktima makausa ka higayon hinungdan sa kamatayon niini.