Pekeng LTO agent gisikop

Pekeng sakop sa Land Transportation Franchising Regulatory Board (LTFRB) nga nanakop og drayber sa usa ka pribadong sakyanan mao hinuoy gidakop ug gibalhog sa prisohan human makit-ing walay pirma sa regional director sa maong buhatan ang iyang ID.

Ang suspetsado nga gitanggong karon sa karsel sa Fuente Police Station mao si Erwin Ledesm, 45, molupyo sa Barangay T. Padilla ning dakbayan gipasanginlang nangilkil og P200 gikan sa driver nga si Mario Parangan.

Si Parangan mitug-an sa kapolisan nga nagpaabot siya sa iyang agalong dunay gibisita diha sa usa ka ospital sa uptown area dihang giduol siya sa suspek ug nagpailang sakop sa LTFRB ug mipasangil nga milapas siya sa no parking sign.

Sigun pa sa imbestigador sa Fuente Police nga si PO3 Elmo Rosales nga gipasanginlan ni Ledesma si Parangan sa maong salaod apan kini mirason nga igo lang siya nagpaabot sa iyang agalon.

Giingong gumikan sa iyang kalapasan si Ledesma nangayo og P300 nga multa kang Parangan apan kini mirason nga P100 lang gyud ang iyang kwarta maong gipaabot na lang ang agalon niini kinsa dihang miabot midugang og laing P100.

Apan una pa makalakaw ang suspek namatikdan sa agalon ni Parangan nga walay pirma ni LTFRB 7 Director Rogelio "Jingjing" Osmeña ang ID niini maong wala niya kini palakta.

Ang suspek sa kahadlok nga mabisto daling midagan apan gigukod siya ni Parangan ug napugngan samtang nanawag og polis ang agalon niini hinungdan sa pagkasikop sa suspek, narekober gikan kaniya ang P200 nga "multa" nga iyang gipahamtang sa drayber ug agalon niini ingon man ang pekeng ID.

Dihay mga sakop sa LTFRB-7 drayber gipaadto sa buhatan sa Fuente Police ug natinong dili gyud siya sakop sa LTFRB sanglit walay nakaila kaniya. Nianang tungura si Ledesma gikatahong miangkong kaniadto pang si Alvin Garcia pa ang mayor sa dakbayan siya nagtrabaho isip traffic enforcer.

Sumala pa niya napugos siya sa paghimo sa ingon gumikan kay wala siyay nahuna-hunaang laing pangita apan nangangkon kini nga kini pa ang unang higayon nga mihimo siya sa maong salaod.q