Mandaue police andam moatubang sa kiha sa BOC

Andam atubangan sa kapolisan sa Mandaue ang kaso nga isang-at tungod sa pagsakmit sa tulo ka mga luho nga right hand drive nga sakyanan.

Kini ang gipadayag ni Mandaue City Director Pablo Florante Lamosao Jr. isip reaksyon sa kasong gisang-at batok kanila ni Custom District Collector Atty. Ma. Lourdes Mangaoang.

Matud pa ni Lamosao nga wala gayod sila mobati bisan gamay nga kabalaka sanglit ang ilang gihimo mao lamang usab ang pagtuman sa ilang trabaho.

Dugang pa ni Lamosao nga ilang giandam ang mga dokumento nga maoy ilang ipamatuod nga legal ang ilang pagsakmit sa maong 40 footer van nga maoy gikargahan sa gipalusot nga sakyanan.

Sa nasayran nga ang mga sakop sa kapolisan sa MCPO ang gipasakaan og kaso ni Mangaoang sanglit sumala pa niini nga ilegal ang pagpanginlabot sa maong kuwerpo sa mga gimbuhaton nga ang BOC lamang ang adunay igong kaakuhan niini.