Kalamboan gipasigarbo

Bohol- Gipasigarbo ni Gobernador Erico Aumentado ngadto sa mga Bol-anon nga atua na nagpuyo sa Estados Unidos ang dako na gayud kaayo nga kalambuan sa probinsiya ug midani kini kanila sa pagduaw sa yuta nga ilang natawhan.

Si Gobernador Aumentado nga atua pa karon sa Estados Unidos dungan sa dakong kalihukan sa mga Bol-anon nga atua nanimuyo mipalanog niini ug miingon nga dako gayud sila og ikatabang sa padayon nga paglambo sa probinsiya.

Matud pa sa gobernador nga sa pagka karon maoy gipalapdan sa iyang administrasyon ang kalambuan bahin sa turismo.

Gani gipaluyohan man usab kini sa programa ni Secretary Joseph Ace Durano sa Department of Tourism.

Giangkon sa gobernador nga molabaw pa gayud unya ang paglambo niini kon matuman na unya ang katukoran sa tugpahanan sa lungsod sa Panglao.

Sa pagkakaron ang pagpangandam gihimo alang sa katukoran sa usa ka tugpahanan sa isla nga lungsod sa Panglao.

Si Gobernador Aumentado sa iyang bahin miingon nga gikinahanglan nga magtinabangay sila alang sa padayon nga kalambuan sa probinsiya.