Protesta padayon

Tagbilaran City - Mibahad ang mga opisyal sa bag-ong natukod nga kahugpongan ning dakbayan nga ipadayon nila ang mga kalihukan sa lihok protesta agig suporta sa kahugpongan didto sa kaulohan nga nanawagan ni Presidente Gloria Macapagal Arroyo nga muluwat sa katungdanan.

Si Secretary General John Ruiz IIIsa Bohol Alliance for the Removal and Ouster of Gloria kon BAROG miingon nga dili gayod sila muhunong pagpasiugda sa lihok protesta.

Matod pa ni Ruiz nga ilang ipakita ngadto sa mga mulopyo ning dakbayan nga dili tinuod nga kinabag-an sa mga mulopyo mipaluyo sa liderato ni Presidente Arroyo.

Ang pamahayag ni Ruiz misukwahi sa pangangkon ni Gobernador Erico Aumentado nga kinabag-an sa katawhan sa probinsya nagpaluyo gayod ni Presidente Arroyo.

Si Aumentado miingon nga pipila lang ka mga tawo ning dakbayan og gikan sa probinsya ang wala mahiuyon sa pagdumala sa nasod ni Presidente Arroyo.

Naglaum ang gobernador nga daghan nga proyekto ang ilang mapaabot ubos sa administrasyon ni Presidente Arroyo.