AIR FORCE gitabangan

Usa ka sakop sa Philippine Air Force nga nadestino sa Central Command milandig sa tambalanan human kini tabangi og dunggab ug tigbas sa pundok sa mga silingang hubog diha sa Sitio Bantayan Barangay Poblacion lungsod sa Cordova.

Ang biktima kinsa milandig sa Central Command Military Hospital gumikan sa mga samad dinunggaban ug tinigbasan giilang si Master Sergeant Cesar Sampiano kinsa Military Police sa Benito Ebuen Airbase sa Lapu-Lapu City.

Ang gikaharong sa biktima nga si Rolando Cabaocabao, hingkod ang panuigon milandig usab sa tambalanan human makabawos ang biktima ug tigbas kaniya diha sa liog.

Sumala pa sa imbestigasyon sa kapolisan si Sampiano mipalit og sigarilyo diha sa tindahan nga gipanag-iya sa usa ka Helen Sultan diin mag-inom ang grupo nila ni Cabaocabao ug mga higalang sila si Rudy Sultan, Ervin Menguito ug Melchor Menguito.

Gikatahong gipangutana ni Cabaocabao si Sampiano kabahin sa bayaw niining si Roger Premacio apan giingong wala makuntento si Cabaocabao sa tubag ni Sampiano kalit kining milanit og icepick dayong dunggab sa lawas sa sundalo.

Bisan samaran ang biktima diha sa kilid nakahimo kini pagdagan pauli sa balay dayong kuha og sundang ug gitigbas sa tuong bahin sa liog si Cabaocabao hinungdan sa lamok-lamok.

Ang mga kaubanan ni Cabaocabao nga ang duha ka mga Menguito ug Sultan mitabang usab og kulata kang Sampiano. Si Sultan mikuha og botelya sa beer ug didto kini gihapos sa nawong sa biktima.

Daling gidala si Sampiano sa Visayas Command Military Hospital samtang si Cabaocabao gidala sa Vicente Sotto Memorial Medical Center ug ang mga kauban niini natanggong na sa karsel ug gikatakdang pasakaan og kaso.