Kini atol sa gihimong surprise inspection ni Konsehal Augustus Pe sa dili mominos walo ka mga presinto sa kapolisan dinhi sa dakbayan.
Ala una baynte kagahapon sa kaadlawon gisugdan sa konsehal ang iyang gihimong inspeksiyon ug natapos sa pagka alas 3:30 sa kaadlawon.
Matud ni Pe lima ka mga polis nga nadestino sa Pari-an Police station ang iyang nasakpan sa akto nga nangatulog, laing lima sa Waterfront, upat sa Mabolo Police Station, duha sa Carbon Police Station, usa sa Tabo-an Police, duha sa Pardo, duha sa Punta Princesa ug laing usa sa Mambaling Police station.
Matud ni Pe siya pa mismo ang nagpukaw ning maong mga nagduty nga polis dihang iyang personal nga gisusi ang maong mga buhatan gawas lang sa tulo ka mga presinto nga wala niya masuroy nga mao ang Fuente Police, Talamban ug ang Guadalupe Police Station.
Matud sa konsehal mihimo siya sa maong kinalit nga inspeksiyon gumikan sa daghang mga reklamo nga iyang nadawat batok ning mga presinto diin ang mga polis mangatulog atol sa oras sa ilang duty ug dili na makaatiman sa mga reklamo.
Gipadalhan og notisya sa konsehal si Cebu City Police Office Acting Chief Melvin Gayutin aron patubagon ang 22 ka mga polis nga nasakpang nangatulog sa oras sa ilang duty sulod sa 48 oras human nila madawat ang notisya.
Matud sa konsehal posibleng irekomendar niya ngadto kang Mayor Tomas Osmeña nga ipakanselar ang tagsa ka lbo nga incentive allowance nga gihatag sa siyudad ngadto sa maong mga polis matag bulan kun dili siya matagbaw sa mga katarungan niini. Gawas niini posible usab nga iya kining irekomendar aron ipabalhin og destino gawas sa dakbayan sa Sugbo.