Si Acting Cebu City Police Director Melvin Gayotin mibutyag sa Banat News nga subsob nga monitoron sa kapolisan ang mga dapit diin magkanunayan ang mga miyembro sa mga fratmen nga nalambigit sa kagubot dinhi sa dakbayan.
Samtang pangusgan usab sa CCPO ang pagpangita sa mga frat members nga nalambigit sa daghang mga krimen nga misangpot sa pagpamatay sa isig ka miyembro sa Alpha Kappa Rho ug sa Tau Gamma Phi.
Si Criminal Investigation and Intelligence Branch Chief Pablo Labra mitug-an sa Banat News nga kagahapon nakigtagbo siya sa mga opisyales sa Barangay Sambag Uno ug Dos uban sa mga kadagkuan sa Southwestern University may labot sa tensyon sa duha ka mga fraternity diha sa ilang tunghaan.
Niadtong nakalabay'ng semana usa ka sakop sa Akhro nga si Janeel Anthony Espinosa gipusil patay sa luyong bahin sa tunghaan ug nasundan kini niadtong Sabado sa gabii sa haya ni Espinosa diin laing miyembro sa Akhro ang gipusil ug usa ang naangin nga naangol.
Si Labra nagkanayon nga motukod sila og outpost diha sa mga dapit diin magtapok ang mga fratmen nga bantayan sa mga polis ug barangay tanod samtang dunay ibutang nga usa ka patrol car sa Mobile Patrol Group.