Mga tinun-an nasudla'g 'ispirito'

Nasuspenso ang klase sa usa ka pribadong tunghaan human gikatahong nagubot dihang dunay mga tinun-an sa 2nd year ang giingong nasudlan og "ispirito" ug mihasi sa klase.

Si Inspector Carmelita Condevillamor sa Dumanjug Police mitug-an sa The Freeman/Banat News nga dunay 30 ka tinun-ang babaye ang nakit-ang nangaluro ug nagwala sa Little Flower School nga gidumala sa mga madre ang giingong susamag nangasudlan og "dautang ispirito".

Matud pa ni SPO1 Joselito Abella sa Banat News mibati ang mga tinun-an og pagkaluya, pamuypoy sa ilang kalawasan ug ang uban nakuyapan apan pagsumbalik sa ilang panimuot mokalit na kini og siyagit ug gikatahong kusgan na kaayo.

Nunot sa hitabo sa mga tinun-an nahunong ang klase ug gipatawag ang mga ginikanan sa mga bata ug maoy mitabang sa ilang mga anak nga gikatahong dili kapugngan sa pagkisi-kisi.

Apan naobserbahan ni Abella nga walay bisan usa sa mga tinun-ang lalaki ang "nasudlan" og dautang ispirito sanglit mao pa man gani ang mitabang og sakwat sa mga babayeng classmate nga gisudlan og dautang ispirito.

Sigun pa ni Condevillamayor ang mismong tagdumala sa tunghaan nga madre wala mopanumbaling kaniya sa iyang gisugilon nga posibleng nasudlan og dautang ispirito ang mga bata.

Pipila sa mga tinun-an ang gikatahong gihiling sa municipal health officer ug ang uban gidala sa ilang ginikanan sa binisaya nga tambalan.

Niadtong nakalabay'ng adlaw dihay unom ka mga tinun-ang babaye sa maong tunghaan ang nangahilo human makakaon og piniritong lumpya sa usa ka kan-anan duol sa maong tunghaan .

Matud pa ni Abella sukad niadto nagsunod na ang insidente nga dunay natahong nakuyapan sa mga tinun-an diha sa maong tunghaan hinuon wala pa maklaro sa kapolisan kun unsay hinungdan sa bag-ong insidente apan gibutyag nga duha sa mga nangahilo naapil usab sa mga giingong nasudlan karon og dautang ispirito.