Pribadong luna gipadampingan, gireklamo

Gibunggo ni Barangay Kapitan Zaldy Lumapas sa Umapad, siyudad sa Mandaue ang gihimong pagpanguwarta sa pipila ka mga tawo sa ilabay nga basura nga gikan sa pribadong establisamento ug itambog sa pribadong luna nga nakalapas sa gipatuman nga ordinansa sa kagamhanan sa maong dakbayan.

Si Lumapas miingon nga ang pagkabunggo sa pagpanguwarta sa gilabay nga basura nga gawas na sa dumping site niini natigayon dihang ang mga lumolupyo nag-ambahan na sa pagreklamo ngadto kaniya tungod sa nasinati niining kabaho.

Matud pa ni Lumapas nga gipahimuslan sa pipila ka mga tawo ang higpit nga pagpatuman sa ordinansa sa dakbayan nga ang mga pribadong dump truck nga magkarga og basura gidid-an na sa paglabay ngadto sa dumping area nga maoy gilabayan sa mga basura nga gikarga sa dump truck sa kagamhanan ug kabarangayan sa dakbayan.

May mga pribadong establisamento nga gikan sa gawas sa dakbayan sa Mandaue molabay usab unta og basura sa dumping area sa dakbayan apan dili na kini makasulod sanglit higpit na man kining gidili.

Matud pa ni Lumapas nga dihang gihimo niya ang pakisusi maoy iyang naabtan ang duha ka pribadong dump truck nga puno sa basura nga nagdala sa plate number nga GNT 531 ug GRF 113 ug ang mga drayber nga iyang gisukitsukit mitug-an nga may mga tawo sa maong dapit nga ilang gibayran nga maoy naghatag kanila og pagtugot.