Pagpalambo sa elektrisidad sa Bohol

Tagbilaran City- Gitinguha karon sa mga opisyal sa probinsya sa Bohol nga maseguro ang abundang suplay sa elektrisidad ning probinsya pinaagi sa pagpatuman sa proyekto sa usa sa mga lungsod niini.

Ang Provincial Development Council miduso na og usa ka resolusyon nga nagh indosar sa proyekto nga Cantakoy Falls Hydropower project sa Wahig-Inabanga River Basin sa lungsod sa Danao.

Nangayo usab og suporta ang mga opisyal sa probinsya sa Regional Development Council alang sa pagtuon nga himoon sa maong proyekto.

Gawas sa resolusyon nga giduso ngadto sa RDC, ang mga opisyal sa probinsya miduso usab sa laing resolusyon ngadto sa kadagkuan sa Department of Energy.

Si Gobernador Erico Aumentado mipahibawo nga ang kadagkuan sa Japan International Cooperation Agency kon JICA sa tigum nga gihimo niini sa miaging buwan mipasalig kaniya nga muhatag og gahin alang sa pagtuon sa maong proyekto.

Midugang ang gobernador nga ang gahin alang niini pagakuhaon gikan sa Development Study Program sa JICA.

Nagkanayon si Aumentado nga ang giproponer nga Cantakoy Falls Hydropower project nalakip sa Central Visayas Regional Development Investment Program sa tuig 2005 ngadto na sa 2010.

Gumikan niini si Gobernador Aumentado malaumon nga ang RDC mupaluyo usab sa pagtuon nga himoon alang sa maong proyekto.