Amahan gireklamo sa 3 ka anak kay gi-abuso samtang wa ang inahan

Tulo ka magsuong babaye midangop sa kapolisan ug mireklamo sa gihimong pagpangabusong sekswal sa ilang amahan ngadto kanila diha sa usa sa mga barangay sa lungsod sa Cordova.

Nakaingon sa pagkabisto sa yawan-ong buhat sa 45-anyos nga amahan sa mga biktima mao ang kinamanghurang anak nga babayeng 4 anyos kinsa mireklamo ngadto sa iyang inahan sa pagsakit sa iyang kinatawo.

Adtong Hunyo 21 alas 6:30 sa gabii wala diha ang inahan sa mga biktima diha gihimo sa suspek ang pagpangabuso apan dihang miabot ang inahan atol sa paghimasa ug paghugas niini sa kinatawo sa anak misiyagit kini sa kasakit nga nakapahibulong sa inahan.

Dihang gipangutana ang bata mitug-an kining gisulod sa iyang papa ang tudlo niini diha sa iyang kinatawo.

Human sa rebilasyon sa anak mitug-an usab ang mga maguwang niini nga nagpangidaron ug 12 ug 16 kinsa parehong mipasangil sa susamang pagpangabuso sukad sa sila gamay pa hangtud nga nagdako.

Si PO1 Danilo Talandron sa Cordova Police mitug-an sa Banat News nga sa resulta sa medical examination sa doktor mitumaw nga negatibo ang tulo nga nalugos gyud.

Apan dako ang pagtuo sa kapolisan nga lig-on ang kaso batok sa suspek bisan sa resulta sa eksaminasyon sanglit ang pamahayag sa mga biktima maoy saligan sa maong kaso sanglit walay matarong nga anak nga moduot sa matarong usab nga amahan.