CEBU, Philippines - Kapin sa dose mil pesos ang nasakiyo sa duha ka armadong tulisan nga nagpakaaron-ingnon nga customer dihang gitulis niini ang lotto outlet didto sa barangay Poblacion sa lungsod sa Compostela niadtong Miyerkules sa hapon.
Ang biktima mao ang teller sa lotto outlet nga si Ian Morre, 29, molupyo sa maong lugar.
Matud ni PO2 Arnie Goc-ong, imbestigador sa Compostela Police Station dihang nahinabi sa Banat News dungan nga nangabot ang mga tulisan ug nagpakaaron-ingnon usab nga mopusta.
Apan dihang nanglakaw na ang ubang mga kustomer kalit mibunot og armas ang duha ug diretso og tion ngadto kang Morre dayong deklarar og tulis dungan sa pagmandong paablihan ang security lock sa butangan sa kwarta.
Ang usa sa mga tulisan misulod sa teller ug gikuha ang tanang halin niini nga mokapin og P12 mil ug pagkahuman nag-iyahay og sakay sa ilang motorsiklo nga pulos Honda XRM nga kolor puwa ug itom.
Matud sa mga nakasaksi ang kolor puwa nga motor didto mopaingon sa siyudad sa Danao samtang ang kolor itom nga motor didto mupaingon sa lungsod sa Liloan.
Ang kapulisan padayon pa sa ilang imbestigasyon sa maong panghitabo. (BANAT NEWS)