28 ka responders sa Lapu-Lapu nipaubos sa pagbansay

CEBU, Philippines — Niabot ngadto sa 28 ka emergency responders sa Lapu-Lapu City ang nipaubos og espesyal nga pagbansay alang sa pagluwas sa mga biktima nga mahimong ma-trap sa mga guba nga istraktura isip kabahin sa pagpalig-on sa disaster response capability sa siyudad.

Ang 10 ka adlaw nga Collapsed Structure Search and Rescue (CSSR) training gipahigayon diha sa Mini-City Hall Complex sa Barangay Talima, Isla sa Olango diin gitudloan ang mga responder sa mga pamaagi sa pagpangita, pag-abot, ug pagluwas sa mga biktima nga natabonan o na-trap ilawom sa mga guba nga building.

Ang 28 ka trainee gikan kini sa Lapu-Lapu City Disaster Risk Reduction and Management Office (DRRMO) ug Lapu-Lapu City Fire District.

Gipahigayon ang pagbansay pinaagi sa inter-agency effort nga gipangulohan sa mga instructor gikan sa Armed Forces of the Philippines (AFP), Bureau of Fire Protection (BFP), Emergency Rescue Unit Foundation ug Office of Civil Defense (OCD). Sentro sa espesyal nga kurso ang pag-andam sa mga responder sa pag-atubang sa mga insidente diin adunay mga tawo nga na-trap ilawom sa debris human sa pagkahugno sa mga istraktura. Gitun-an usab sa mga responder ang hustong pag-assess sa mga nahugno nga building ug ang mga pamaagi sa pagluwas sa peligro gumikan sa dili lig-on nga istraktura ug nagkatag nga debris. Kabahin ang pagbansay sa mga pagpangandam sa siyudad alang sa mga emerhensiya ilabina sa posibleng kusog nga linog nga mahimong hinungdan sa pagkaguba sa mga building ug pagdagsang sa mga biktima.

Ang pagbaton og mga personnel nga adunay espesyal nga CSSR skills makatabang sa siyudad sa pagpadala og mga responder nga hanas sa mga operasyon sa pagpangita ug pagluwas panahon sa dagkong insidente.

Gitumong usab sa 10 ka adlaw nga pagbansay ang pagpalig-on sa koordinasyon tali sa nagkalain-laing emergency personnel ug ahensiya ilabina sa mga kalamidad nga nagkinahanglan og daghang rescue teams.

Matud sa city government nga ang pagpalig-on sa kahibalo ug kapasidad sa mga responder usa sa mga lakang niini aron mapauswag ang disaster preparedness ug mamenosan ang posibleng casualties panahon sa natural calamities ug uban pa’ng emerhensiya. (BANAT NEWS)