Kakutloan og pagtulon-an

Dili sayon ang nahiagoman ni Police Major Eldefonso Miranda Jr. nga nahimong hepe kaniadto sa Argao Police Station, kay karon, siya na maoy maisip nga piniriso sa bilanggoan nga ubos kanhi sa iyang pagdumala.

Unsaon, nakonbikto si Major Miranda sa kasong paglapas sa Republic Act 3019, kun Anti-Graft and Corrupt Practices Act, nga gipasaka batok kaniya sa mga kauban ra niyang polis.

Ang mipasaka og kaso ni Miranda mao ang PNP-Integrity Monitoring and Enforcement Group (IMEG), ang intelligence unit sa kapolisan nga gitahasan paghimo’g kampanya batok sa mga badlongon nga polis.

Kaniadtong tuig 2000, hepe pa sa Argao Police Station si Miranda apan gidakop siya sa mga sakop sa IMEG nga mironda sa police station ug nasakpan ang hepe nga may kadulog nga babaye.

Nagpangedaron pa og 46 niadto si Miranda, ug giingong ulitawo pa, apan ang nakaapan lang kay ang 23-anyos nga babayeng gikatupad niya sa paghiga sa iyang kuwarto sulod sa police station usa man ka piniriso.

Matud sa IMEG nga nag-atubang og kaso ang maong babaye, uban sa lain pa nga babaye, apan wa kini isulod sa prisohan. Ang usa iyang itupad sa paghigda, ug ang laing babaye, sugo-sugoon.

Natan-aw sa IMEG nga dako kining salawayon mao nga gironda nila ang police station ug nasakpan gyud si Miranda sa akto nga nakigdulog sa babaye nga usa ka piniriso.

Gipasakaan si Miranda og kasong Direct Bribery ingon man paglapas sa Anti-Graft and Corrupt Practices Act, ug mao nga siya nakonbikto human sa mga unom ka tuig nga paghusay sa iyang kaso.

Hinoon, giingong dili ra kaayo dako ang naangkong silot nga pagkapriso ni Miranda, apan subra kini sa unom ka tuig ug dili siya maka-avail of probation aron makagawas lang unta sa bilanggoan. Unsay pagtulon-an nga makuha niini? Dili gyud maayo nga abusohan nato ang atong katungdanan. Ingon niadto, bisan og way pagsupak sa babayeng piniriso nga idulog-dulog siya sa hepe sa pagkatulog sa iyang kuwarto, apan ang gihimo ni Miranda dakong salawayon.

Mao nga dihang gi-counter check sa IMEG ang nadawat nilang report, dunay mga polis sa Argao nga way pupanaga nga mihatag og impormasyon kay wa sila makagusto sa gihimo sa ilang hepe.

Karon, uwaw kaayo ni kay si Miranda nahimo na nga dinakpan ug temporaryong gi-detain sa police station nga siya maoy hepe kaniadto. Matud pa nga si Miranda, balhinon kini sa prisohan nga gidumala sa Bureau of Jail Management and Penology. Gi-dismiss na diay ni sa pagka polis si Miranda. Pastilan, giusikan lang gyud niya ang iyang pagka opisyal nga ang nagranggo og “major” karon mosweldo na og mga P90,000 ang buwan.