AVC Beach Tour papalo sa Nuvali

MANILA, Philippines — Hahataw ang mga collegiate stars para katawanin ang Alas Pilipinas sa AVC Beach Tour Nuvali Open na magsisimula ngayong araw sa Nuvali Sand Courts By Ayala Land sa Santa Rosa, Laguna.

Nangunguna sa lista­han sina University Athletic Association of the Philippines Season 87 champions Kat Epa at Honey Grace Cordero ng National University, at runners-up Khylem Progella at Sofia Pagara ng University of Santo Tomas (UST).

Papalo rin si Sunny Kalani Villapando na nag­laro para sa Stanford sa National Collegiate Athletic Association Division I, kasama si Jenny Gaviola ng Philippine Coast Guard habang magtatambal sina Alexa Polidario ng Philippine Army at Lorien Ysobel Gamboa ng UST.

Makikipagsabayan ang mga Pinoy pairs sa malalakas na foreign teams kabilang na si Australian Stefanie Fejes na target ang se­cond straight Nuvali Open title kasama si Jasmine Fleming.

Aariba din sina Georgia Johnson at Elizabeth Alchin sa event na may nakalaang $2,500 o P143,000 sa magkakampeon.

Pasok din sina Wora­peerachayakorn Kongphopsarutawadee at Taravadee Naraphornrapat ng Thailand at sina Yan Xu at Zhou Mingli ng China.

Nagbabalik din sina Abbas Pourasgari at Alireza Aghajanighasab ng Iran at sina Pithak Tipjan at Poravid Taovato ng Thailand.

Papalo naman sa men’s division sina Alas bets James Buytrago at Rancel Varga na silver medalists sa FIVB Futures Nuvali gayundin sina Edwin Tolentino ng NU at Lerry John Francisco ng Coast Guard, at Ronniel Rosales ng Perpetual at Ale­xander Jhon Iraya ng NU.