P97.7 milyong infra budget gitunol para sa 2nd District

CEBU, Philippines — Sa paningkamot nga mapalambo ang lokal nga imprastraktura, ang Kapitolyo sa Sugbo mipundo og P97.7 milyones nga ayuda alang sa pito ka lungsod sa ikaduhang distrito sa lalawigan.

 Si Gobernador Gwendolyn Garcia, kauban si Bise Gobernador Hilario Davide III ug Kongresman sa Ikaduhang Distrito Edsel Galeos, nangapud-apod sa mga tseke ngadto sa mga opisyal sa lokal nga kagamhanan atol sa Caravan of Services nga gipahigayon sa Sec. Cerge M. Remonde Sports & Cultural Center.

Ang lungsod sa Argao nakadawat og dakong bahin sa maong hinabang nga P8 milyones alang sa buhatan sa mayor, P5.1 milyon alang sa buhatan sa bise mayor ug mga sakop sa Sangguniang Bayan (SB), ug P300,000 matag usa alang sa Barangay Jampang, Barangay Anajao, ug Barangay Catang.

Nakadawat sad ang lungsod sa Dalaguete og P8 milyon alang sa buhatan sa mayor, P5.4 milyon alang sa buhatan sa bise mayor ug mga sakop sa SB, ug P300,000 matag usa alang sa Barangay Bulak, Maloray, ug Bulad.

Sa samang paagi, ang Munisipyo sa Alcoy nakadawat og P8 milyon alang sa buhatan sa mayor, P5.4 milyon alang sa buhatan sa bise mayor ug mga sakop sa SB, samtang ang Barangay Daanlungsod, Atabay, ug Pugalo nakadawat og P300,000 matag usa.

Ang Munisipyo sa Boljoon gitunolan og P8 milyon alang sa buhatan sa mayor, P6 milyon alang sa buhatan sa bise mayor ug mga sakop sa SB, ug P300,000 matag usa alang sa Barangay El Pardo, Arbor, ug Granada.

Sa laing bahin, ang Munisipyo sa Oslob nakadawat og P8 milyon alang sa buhatan sa mayor, P1.8 milyon alang sa buhatan sa bise mayor ug mga sakop sa SB, ug P300,000 matag usa alang sa Barangay Hagdan, Alo, ug Bangcogon.

Ang Santander nakadawat og P8 milyon alang sa buhatan sa mayor, samtang P6.3 milyon ang gitudlo alang sa buhatan sa bise mayor ug mga sakop sa SB.

Ang Munisipyo sa Samboan nakadawat og P8 milyon alang sa buhatan sa mayor, P6.6 milyon alang sa buhatan sa bise mayor ug mga sakop sa SB, ug P300,000 matag usa alang sa Barangay Canorong, Calatagan, ug Camboroy.

Sumala sa Sugbo News, ang opisyal nga media arm sa Kapitolyo, kini nga kalihokan mao ang ikanapulo ug kataposang Caravan of Services alang sa distrito, nga nagpakita sa padayon nga dedikasyon ni Garcia sa pagpauswag sa imprastraktura ug pagpalambo sa kalidad sa kinabuhi sa mga residente sa Ikaduhang Distrito.

 Pinaagi sa maong inisyatiba, gimando sa gobernadora ang paglig-on sa lokal nga pagpangulo ug direkta nga pagpahimulos sa mga residente pinaagi sa pagpaayo sa mga estraktura sa komunidad.(BANAT NEWS)