Nabuang sa sugal nga scatter,  nanglabni apan nasikop

CEBU, Philippines — Nadakpan ang usa ka 27-anyos nga lalake nga nanglabni og cellphone nga Iphone15 Pro Max ug giprenda kay gibayad sa iyang utang gumikan sa online nga sugal nga scatter.
Nasikop ang suspek diha sa sitio Ponce 1, Barangay Carreta, siyudad sa Sugbo, Miyerkules sa buntag, Hunyo 26, 2024. 
Ang suspetsado mao si alyas Andres, residente sa Sitio Ponce 1, Barangay Carreta samtang ang biktima usa ka 25 anyos nga babaye nga taga Barangay Guadalupe, ning siyudad. 
Sa imbestigasyon sa Police Station 1 sa Cebu City Police Office ang biktima midangop nila ug ni-report nga alas 5:30 sa buntag sa adlaw'ng Miyerkules habig sa stoplight sa General Maxilom Avenue corner Imus Road, Barangay Lorega San Miguel sakay siya og motorsiklo samtang gahunong gigamit niya iyang cellphone apan kalit kining gilabni sa suspetsado.
Dali nga nihimo og follow up operation ang kapolisan, nakig-alayon sa barangay ug nakakuha sila og kopya sa CCTV nga nakatabang nga nailhan ang suspek ug nadakpan didto sa ilang panimalay. 
Giangkon sa suspetsado nga nahimo niya ang krimen gumikan kay dako na siya og pildi sa sugal nga scatter. 
Gani wala na siya makahinumdom kung pila na iyang pildi ug daghan na sab siyang mga gamit nga nawala kay iprenda. 
"Tulo ka cellphone, sa akong pares nawala ug akoa, prenda daog tungod kay pa cash in", sigon sa suspetsado. 
Taod-taod na matod pa siya nagduwa og scatter diin ang pusta niya kay P10 o P20. 
Gumikan kay ang unang daog niya sa maong sugal kay niabot og P40,000 mao kini ang rason nga wala na siya nihunong og duwa.
Ang Iphone15 Pro Max nga kapin sa P80,000 ang presyo giprenda sa suspek og P16,000. 
Gigamit niya ang kwarta sa pagpalit og tulo kabuok cellphone ug ang uban gibayad sa utang.
Tungod kay naadik sa scatter pito na ka cellphone ang naprenda sa suspetsado.
Nangayo og pasaylo ang suspek sa biktima ug nanghinaot nga dili idayon ang pagpasaka og kaso. 
Subay niini, si Police Major Marvin Fegarido, Hepe sa Police Station 1 sa Cebu City Police Office mibutyag nga desidido mopasaka og kaso ang biktima.
Sa pagkutlo ning balita giandam na nila ang mga dokumento aron masang-at ang kasong pagpangawat. 
Nagkanayon sab si Major Fegarido nga susihon nila kun dunay kaso ang dinakpan sa laing police stations o unit. Nagpahimangno sab ang opisyal nga likayan kining sugal kay wala kini ikahatag nga maayong resulta. —MEL BANAT NEWS