Nailad nga damgo sa Australia

Dili lang gatosan kon dili liboan ka mga tawo ang nailad sa grupo nga nang-recruit kanila nga patrabahoon sa Australia isip mga mag-uuma sa mangga ug lubi didto. Pastilan naman gyud klaro na kaayong pagpangilad ug nilampos kining sindikato kay perting daghana man gyud ang ilang nasulod sa bulsa nga mga tawo nga nangindahay nga maharuhay ang pagpuyo kong mahatagan og katumanan ang ilang damgo nga maka abroad.

Nadakpan sa mga sakop sa National Bureau of Investigation ang siyam ka mga tawo nga nagpaluyo sa pagpangilad apil ang gitumbok nga lider sa nila pinaagi sa entrapment operation didto sa Barangay Pooc dakbayan sa Talisay niadtong adlaw’ng Domingo.

Napasakaan na sila og kasong large scale illegal recruitment nga walay piyansa ug kasamtangang gitanggong sa detention facility sa NBI Regional Office-7 diin ang lider nila hugot nga nihimakak sa pasangil kay limpyo kuno ang ilang konsensya.

Ang akong gikaloy-an kadtong mga kaubang nadakpan nga mga na-recruit nga naapil sa pagkasikop kay biktima ra man usab sila sama nalang sa usa ka security guard nga gipasaligan nga mauna sa pagpadala ngadto sa Australia basta boluntaryong moserbisyo sa mga kalihokan nga ilang himoon.

Ang modus sa grupo magpahigayon sila og panagtigom o seminar sa usa ka barangay ug magpabayad og registration fee. Adunay mga t-shirt nga P500 ang kantidad ug ang vlog nila nga 1,500 ang bayad. Ipaatubang sa camera ang mga applicant ug pasul-obon og kalo nga daw sama gyud sa mag-uuma dayon ipabasa ang script nga hinimo na daan kay mao kuno kadto ang ipadala sa mga employer sa Australia.

Hilabihan gyud kadaghan ang nailad kay halod kada lungsod ang ilang na-penetrate ug dili mominus sa usa ka gatos ang ilang ma-recruit kay target nila kadtong mga adunay grupo kay ang mga miyembro madani ug moapil sad aron mahatagan og katumanan ang ilang damgo.

Matud sa usa sa mga nailad nga kinsa kadtong daghan ang ma-recuit ang unang makalarga, morag pyramiding scheme ang estilo nila maong daghan gyud ang nangailad, kong sumahon kuno moabot na sa otso mil ang na-recruit apan hangtud karon wala pa gyuy nakalarga. Sa pagkasikop sa mga scammer daghan pa gyud nga mga biktima gikan sa ubang mga dapit o silingang probinsya ang nireklamo, ingon niini ka lapad ang operasyon niining grupoha. Ang ilang lider sakop kaniadto sa usa ka agency apan gitangtang tungod sa iyang gipanghimo ug nagtukod og kaugalingong grupo.

Ang pangutana karon nganong dali silang maka-organize ug sa barangay o bisan gani kuno sa mga LGU makahuwam sila og mga kahimanan sama sa tent alang sa ilang seminar nga pagahimoon, usa kini sa gitutok sa NBI nganong wala gyud mabantayi nga ang kalihokan nga gihimo usa ka dakong krimen.

Dili lang kining siyam ka mga nadakpan ang naglihok kon dili aduna pay lain nga naglihok sa ubang mga dapit nga gikinahanglan nga mapuhag ug wala nay mabiktima pa.

Ang pangandoy nga mahaw-as sa kalisod ang gihuptan sa halos tanan apan gikinahanglan nga magmatngon aron dili masugamak sa mga tawo nga tampalasan nga mopahimulos sa kalisod sa uban nga maoy ilang sakyan aron madani ug mabiktima. Amping lang gyud.