Tungod lang sa politika mga tawo gipangkulban sa kaldero

Kini ang klaro kaayo nga nahitabo sa Barangay Umapad dakbayan sa Mandaue diin wala intawon masweldohi ang mga yanong kawani sa barangay tungod kay wala mopirma ang usa ka konsehal kinsa gustong mahasubay kuno sa proseso ang tanan.

Pastilan intawon grabe ka perpekto ba niining opisyala ug ligdong seguro kaayo siya sa iyang pagtuo nga kinahanglan walay mantsa sa kasaypanan ang tanang transaksyon sa baranggay bahalag mangamatay sa kagutom ang ilang mga trabahante.

Nganong naproseso ug nasweldohan man lagi ang mga opisyal? Unsa may kalainan sa proseso niadtong mga pobre uyamot nga mga empleyado nga nagsalig intawon sa ilang panginahanglan sa gamayng sweldo gikan sa ilang baranggay.

Dili kini pinangayo nga kwarta kay giserbisyohan kini nila busa angayan lang nga ila kining madawat. Asa naman intawon ang kasing kasing niining opisyal o mga opisyal nganong gipaantos nila og lima ka buwan ang mga kawani?

Walay problema sa kapitan diha kay kong siya ang pagbut-on hagbay ra nasweldohan ang mga trabahante apan kining iyang mga konsehal nga naghupot sa mga gamhanang komitiba diha kay lagi sila ang majority mababagan gyud ang tinguha sa amahan sa baranggay.

Gusto nila i-hostage ang ilang kapitan apan ang mga ordinaryong molupyo nila ang nabuthan, tataw kaayo nga sa away nila sa politika ang mga trabahante ang colateral damage.

Nahulog naman hinuon ni nga mas gamhanan pa kining konsehal kay sa kapitan sa Barangay Umapad. Unya makatugot ka ani kap nga himoon ka lang kiko diha sa barangay nga ilogan ka sa imong gahum?

Gipamukha nila nimo kap nga inutil ka sa imong katungdanan kay sila ang mas gamhanan. Ayaw paundayoni nga tumban kay ikaw man kaha ang amahan sa imong barangay.

Angayan unta nga niaksyon na ka dayon wala nimo gihuwat ang lima ka buwan nga nakulban sa kaldero ang imong mga trabahante.

Maayo man kining mga opisyal sa barangay kay nagpadayon ang ilang sweldo ug gawas pa wala man sila magsalig sa sweldo kay hayahay man ang kabutang nila busa pasagdan nalang ang mga pobreng kawani nga madamay sa ilang away.

Power tripping ang gihimo niining grupo sa konsehal ug nilampos sila kay napakyas man pud pagpanalipod ang ilang kapitan nga nisugot lang nga yatakan ang iyang katungod isip amahan sa katawhan.

Hinuon nidangop naman sa Ombudsman ang kawani, unta mapahamtangan og bug-at nga silot kining mga tawo nga nagkulob sa kaldero sa mga trabahante, wala sila kaila humanitarian consideration, kong kuwang man ang mga gisumiter nga dokumento, mitabang unta ang konsehal sa pagkompleto niini aron mapasayon ang tanan.

Pero klaro kaayo ang hinungdan niining tanan, ang pamolitika, busa mga tawo ra ang mohukom ninyo inig abot sa tukmang panahon kay dili gyud ni makalimtan ang mga public servant kuno nga walay kasingkasing.