La Viuda (9)
KINAUMAGAHAN, habang nagpapahangin si Kristina sa hardin ng mansiyon, biglang humarang sa kanyang daan si Ernesto. May nakalolokong ngiti sa mga labi ng binata habang patay-sinding pinaglalaruan ang hawak na lighter.
“Kamusta ang buhay dito sa Punta Dolores?” nakangising tanong ni Ernesto habang tinititigan mula ulo hanggang paa si Kristina.
“Maayos naman… bakit mo naitanong?” hindi komportableng tugon ni Kristina.
“Wala lang, kinukumusta lang kita. Pansin ko kasi… parang at home na at home ka na doon sa musuleo.” Natatawang paliwanag nito.
“Anong ibig mong sabihin?”
“Ang lakas ng boses mo kagabi. Dinig na dinig kita may kausap kang lalaki.”
Nagulat man, pinilit ni Kristina na maging kalmado. “Wala akong kausap,” malamig niyang tugon sabay iwas ng tingin.
“Kung ano man ang pakulo na ginagawa mo para magpanggap na nakakausap mo ang Kuya Emilio ko, hindi mo ako maloloko.”
Mabilis na tumalikod si Kristina at pumasok sa mansiyon. Agad siyang dumiretso sa maliit na kuwarto na ginagamit niya tuwing umaga. Pagkasara ng pinto, inilabas niya mula sa kanyang bulsa ang panyong may tuyong dugo, ang dugo ng kanyang “asawa.” Tinitigan niya iyon nang matagal. Hindi nagdurugo ang multo. Hindi rin nag-iiwan ng bakas ng putik ang isang espiritu.
Ayon sa napag-aralan niyang mga pamahiin, baka ang kanyang labis na pagmamahal at pananalig ang dahilan kung bakit nagkakaroon ng pisikal na anyo ang espiritu ni Emilio. Naniniwala siyang bumabalik ang katawan nito upang magkasama sila.
Samantala, sa hardin kung nasaan pa rin si Ernesto, nakatingala siya sa bintana ng kuwarto ni Kristina. Ang pagiging mailap ng dalaga ay lalo lamang nagpaalab sa kanyang pag-usisa.
Nang mag-agaw ang dilim at ang liwanag, dumarating na naman ang oras ng pagpapakulong kay Kristina sa musuleo. Habang inaalalayan siya ng dalawang tauhan ng hacienda patungo sa gitna nang malawak na bakuran, hindi nila napansin na may tahimik na sumusunod sa kanila sa ilalim ng mga matataas na puno ng kalachuchi.
Si Ernesto. Handang alamin kung anong hiwaga ang nangyayari sa loob ng nakakandadong musuleo kapag sumasapit ang hatinggabi.
(Itutuloy)
- Latest
