Comelec padayong nangandam alang sa BSKE

CEBU, Philippines — Ang Commission on Elections (Comelec)-7 nagpadayon sa pagpangandam alang sa Nobiyembre 2, 2026 Barangay ug Sangguniang Kabataan Elections (BSKE) bisan pa sa posibleng pag-postpone sa eleksiyon nga gikonsidera sa Kongreso. Atol sa Kapihan sa PIA kagahapon, si Atty. Francisco Pobe, direktor sa Comelec-7 nga magpadayon ang pagpangandam gawas kon adunay bag-ong balaod nga mopahunong o mag-usab sa schedule sa eleksiyon.

Gikatakda ang pag-file sa certificates of candidacy (COCs) gikan Septiyembre 28 hangtud Oktubre 5, 2026 samtang ang kampaniya magsugod Septiyembre 28 hangtud sa Oktubre 21.

Gipangandaman na sa Comelec-7 ang manpower lakip ang pag-deploy sa mga magtutudlo isip miyembro sa electoral boards, koordinasyon sa Joint Security Council ug ubang nasudnong ahensiya.

Ang Central Visayas adunay 2,312 ka barangay diin1,203 niini sa Cebu ug 1,109 sa Bohol.

Adunay 5,662 clustered precincts alang sa regular barangay elections ug 12,502 alang sa SK elections.

Adunay mga 4.39 milyones ka rehistradong botante sa regular barangay elections ug 1,542,717 ka SK voters.

Matud ni Pobe nga mas maayo nga makahimo dayon og desisyon ang Kongreso sa postponement sa dili pa ang Septiyembre 28 aron malikayan ang gasto ug panahon sa mga kandidato sa pag-andam ug pag-file sa ilang COCs.

Gibutyag ni Pobe nga mga P8 bilyones na ang nagasto o na-disburse sa Comelec alang sa pagpangandam sa eleksiyon base sa taho ni Comelec Chairman George Garcia atol sa congressional budget hearing.

Na-print na ang mga balota ug accountable forms samtang napalit o naandam na ang ubang election supplies.

Ang ubang materiyales mahimong magamit pag-usab kon ma-postpone ang eleksiyon apan ang mga perishable supplies mahimong kinahanglang ilisan ug adunay dugang gasto sa pagtipig.

Gipahibalo usab ni Pobe nga madugangan og P2,000 ang honoraria sa mga miyembro sa electoral boards samtang ang service credits ug panahon nga sakop sa honorarium giusab usab aron mailhan ang ilang dugang responsibilidad sa eleksiyon.