Kaso sa dengue sa Cebu City nisaka

CEBU, Philippines — Misaka pag-ayo ang kaso sa dengue sa Dakbayan sa Sugbo karong tuig kun diin niabot na sa 2,456 ka kaso gikan Enero hangtud Septiyembre 2026 kung itandi sa 1,484 ka kaso sa susamang panahon niadtong 2025.

Sa datos nga gipagawas sa City Health Department (CHD), gisaysay niini ang mga barangay adunay pinakataas nga kaso sa dengue nga gilangkuban sa Guadalupe, Lahug, Basak San Nicolas, Tisa, Labangon, Talamban, Mambaling, Kalunasan, Punta Princesa, Apas, Sambag II, ug Tejero.

Lakip sab ang Ermita, Sawang Calero, Pasil, Quiot Pardo, Lorega, Kalunasan, Duljo Fatima, Calamba ug Suba.

Sa natala sa CHD, niabot na sab ngadto sa 20 ang namatay tungod sa dengue kung itandi niadtong miaging tuig nga anaa lang sa unom ka indibidwal.

Gipahibalo kini ni Kenneth Siasar kinsa chief of staff ni Mayor Nestor Archival nga ang datos sa CHD naglakip sa mga report gikan sa mga tambalanan sa syudad lakip ang pribadong mga health facility.

Sa laing bahin, ang Cebu City Medical Center (CCMC) nakatala og 297 ka na-admit ug 547 ka nagpakonsulta tungod sa dengue gikan Enero 1 hangtod Septiyembre 13. Sa maong ospital, 16 ka pasyente ang namatay tungod sa dengue.

Matud pa ni Siasar, usa sa nakitang hinungdan sa pagsaka sa kaso mao ang kakuwang sa pagpanglimpyo ilabi na sa sulod sa mga panimalay.

Iyang gipasabot nga ang mga lamok mahimong mamuyo sa mga balde ug baril sa tubig nga walay tabon, ug mga lugar nga adunay nagtapok nga tubig sa sulod ug gawas sa balay.

Giingon usab ni Siasar nga ang mga bata maoy kasagarang labing delikado sa dengue tungod kay dili pa kaayo sila lig-on og resistensiya batok sa kagaw sa maong lamok.

Dugang niya nga adunay mga hamtong nga natakdan lakip na ang pipila ka empleyado sa Cebu City Hall.

 Tungod niini, gipahigayon sa kagamhanan ang misting ug general cleanup sa tibuok City Hall niadtong miaging semana human makumpirmar nga adunay usa ka empleyado nga natakdan sa dengue.

Karon nga nagpadayon ang pagsaka sa kaso sa dengue, nimando ang mayor nga dili na maghuwat og hangyo gikan sa mga barangay sa pagpahigayon og misting operations. Unahon ang mga lugar nga adunay pinakataas nga ihap sa dengue base sa datos sa CHD.

Bisan pa sa pagsaka sa kaso ug nisaka sab ang mga namatay sa dengue, si Siasar nagkanayon nga wala pa modeklarar og dengue outbreak ang syudad sa pagkakaron tungod kay kinahanglan pa susihon sa Department of Health (DOH) kun maka-alarma na ba ang sitwasyon sa syudad. (BANAT NEWS)