Tulo patay sa school shootings

CEBU, Philippines — Tulo ang patay ug unom ang nangaangol sa lain napung bayolenteng pagpamusil sa sulod sa usa ka eskuylahan ug ning tungora nahitabo ni sa Banga National High School sa lungsod sa Banga, South Cotabato kagahapon, adlaw nga Biyernes  Septembre 18.

Gikompirmar kini mismo ni South Cotabato Governor Reynald Tamayo ug sa

Department of Education ang kabahin sa maong pagpamusil sa sulod sa maong eskuylahan.

Ang DepEd nipbutyag nga  "deeply concerned" sila aning lain napung nahitabong pagpamusil sa sulod sa eskuylahan.

Ang DepEd niingon nga duna nay koordinasyong gihimo ang Schools Division Office ug Regional Office uban sa mga lokal nga otoridad ug sa law enforcement agencies sa rehiyon aron paghimo og imbestigasyon ug kung unsa nga tabang ang gikinahanglan.

"Our immediate priority is the safety and well-being of our learners, teachers, and school personnel,"  dugang pa sa DepEd.

Gipahibalo sab sa DepEd nga andam silang mohatag og psychological first aid,  mental health ug psychosocial support sa mga naapektohan.

Giawhag sab nila ang publiko nga magpabiling kalmado ug hunongon ang pagpakatap og mga impormasyon sa social media nga dili beripikado sa mga otoridad.

Sa buwag nga pamahayag, ang DepEd Region XII office nanawagan sa publiko nga hunongon ang pagpakatap og videos sa social media bahin sa nahitabo sa Banga ug tahuron ang katungod sa mga biktima ug ilang pamilya.

Matud pa ang maong mga video posibleng makapasamot sa trauma sa mga biktima ug malapas sad ang ilang pribasiya nga gidili sa balaod.

Sa pikas bahin, ang Philippine Red Cross nag-ingon nga unom ka tawo ang nangaangol ug gidala na sa Dantom Doctors Hospital ug sa South Cotabato Provincial Hospital.

Usa sa matud pa naangol ang estudyante nga maoy namusil.

Ang maong hitabo nagsunod ni sa nahitabo tulo ka bulan na ang nakalabay sa San Jose National High School sa Tacloban City atong Hunyo 22, nga nikalas og tulo ka estudyante ug 20 ang nasamdan.

Atong Agosto 18 sad, laing pagpamusil ang nahitabo sa junior high school sa Ateneo de Zamboanga University dihang usa sa ilang mga estudyante nga armado og duha ka pistol nipusil sa usa ka tinun-an ug pagkahuman naghikog sab siya.—Gikan sa Philstar.com/IBM BANAT NEWS