Mga meat handlers giseminar sa DVMF

CEBU, Philippines — Gipahigayon sa Department of Veterinary Medicine and Fisheries (DVMF) ang mandatory seminar mahitungod sa hygienic handling sa mga karne diha sa kamerkadohan.

Ang maong seminar gitumong pagpalig-on sa kahibalo sa meat handlers lakip ang butchers, meat stall handlers, meat shops, meat dealers/suppliers, meat processors, lechon dealers, ug meat vendors kabahin food safety.

Matag Domingo, nagpatuman ang DVMF og enforcement operations sa mga merkado ug dunay madakpan nga labing menos duha ka manindahay nga wala mituman sa regulasyon.

Matud ni Dr. Edelito Galaura DVMF Meat Controller Officer II, nga ang seminar usa ka pamaagi aron mapahimangnoan ang meat handlers sa ilang responsibilidad ug aron malikayan ang mga pagpanikas sa pagbaligya sa karne.

Usa sa unang gisusi sa inspeksyon mao ang Meat Inspection Certificate diin kung walay mapakitang dokumento, awtomatikong ikonsidera ang produkto nga "hot meat" ubos sa Republic Act No. 9296 ug City Ordinance No. 2189, nga mahimong hinungdan sa pagsakmit sa maong karne.

Kung adunay Meat Inspection Certificate apan walay business permit o rehistrasyon sa pagbaligya sa maong produkto, citation ticket lamang ang ipagawas sa DVMF ngadto sa manindahay.

Sumala sa DVMF, ang mga lagda sa hygienic meat handling sa Pilipinas gimando sa National Meat Inspection Service (NMIS) lakip na ang pag inspeksyon sa tanang karne, paggamit og sanitary ug accredited nga sakyanan sa transportasyon, ug pagmintinar sa hustong temperatura aron malikayan ang pagkadaot sa produkto.

Gidugang usab nga ubos sa Department of Agriculture Administrative Order No. 6, Series of 2012, gidili ang pagbaligya o pagdisplay sa frozen meat sa mga pampublikong merkado nga walay haum nga refrigeration facilities tungod sa risgo sa bacterial contamination.

Samtang, gipahinumdoman sa DVMF ang mga manindahay nga dunay silot ang paglapas sa mga regulasyon. Ang unang paglapas adunay multa nga ?2,000, ang ikaduhang paglapas adunay multa nga ?5,000, ug ang ikatulong paglapas ipasaka na ngadto sa Cebu City Legal Office alang sa hustong legal nga aksyon.

Human sa seminar, gihatagan ang mga partisipante og Meat Handler Certificate nga balido sulod sa duha ka tuig. Kini aron maengganyo ug maobligar ang mga meat handlers sa pagtambong sa maong seminar samtang dili usab mahimong hasol sa ilang bahin ang kanunay nga pag-renew. Rachel E. Wenceslao/Josh Kent Panaguinit CNU Journalism intern/MEL BANAT NEWS