Ang Kapitbahay (122)
Natigilan si Vince nang makita na lumabas ng bahay si Ram. Bakit kaya sandali lang ito? Noong nakaraan, naalala ni Vince na dalawang oras itong namalagi sa bahay kasama si Brenda.
Mabilis na lumabas sa gate si Ram. Naglakad palayo.
Ilang minuto ang lumipas, dumating na si Margie. Muntik nang maabot si Ram.
Natunugan kaya ni Ram at Brenda na darating na si Margie kaya umalis nang maaga ang lalaki?
Baka alam ni Brenda ang oras nang pagdating ng ina kaya pinaalis niya nang maaga si Ram?
Muli, naisip ni Vince na dapat nang malaman ni Renan ang ginagawa ni Ram sa anak nito. Masisira ang kinabukasan ni Brenda kapag nagpatuloy ang relasyon. Ang masakit, kalaguyo pa ni Margie ang nagwawasak sa kinabukasan ni Brenda. Nalason na kayang tuluyan ang isip ni Brenda kaya pumatol kay Ram?
O sadyang umibig dito?
Pero sa pagkaalam ni Vince, may boyfriend si Brenda. Nakita na niya minsan ang bf nito. At sa pakiwari ni Vince, may nangyayari na rin sa dalawa. Nakita niya minsan, nagtagal din ang bf ni Brenda sa bahay—halos dalawang oras. Imposible namang nagkukuwentuhan lamang ang mga ito kaya tumagal nang ganun.
Makalipas ang isang buwan, napansin ni Vince na hindi niya nakikita si Brenda. Baka nagbabakasyon sa kung saan. Ang alam niya, nag-graduate na ito sa kolehiyo.
Hindi rin naman niya nakikita si Ram.
Ang mga katanungan ni Vince ay sinagot mismo ni Margie.
Nagdidilig si Vince nang umagang iyon nang makita si Margie na tila tulala sa may pintuan ng bahay. Nakatingin sa kawalan.
Hindi niya iniwasan, bagkus, kinumusta si Margie.
(Itutuloy)
- Latest
