Ang Kapitbahay (86)
“Sosorpresahin ko rin ang asawa ko,’’sabi ni Margie. Seryoso ito.
Napangiti lang si Vince at tiningnan nang makahulugan si Margie.
“Mag-ingat ka Margie.”
“Salamat.”
“Mabuti nang nag-iingat—baka matulad sa nabalita.”
“Hindi naman siguro.”
“Kung iwasan mo na si Ram?”
“Hindi na ako makakaiwas, Vince—mahal ko na siya. Baka nga sundin ko na ang sinabi niya sa akin.”
“Sasama ka sa kanya?”
Tumango si Margie.
“Paano ang anak n’yo —si Brenda?”
“Malaki na naman siya.”
“Kahit na. Masakit sa kanya kung magkakahiwalay kayo ng mister mo lalo’t may third party.”
“Hindi naman ako ang nag-umpisa ng lahat.”
Hindi nakaimik si Vince. Hindi na niya alam kung ano ang ipapayo kay Margie. Hindi naman siya guidance counselor o may kakayahang magbigay ng payo sa isang naliligaw ng landas na tulad ni Margie.
“Hindi ko na alam ang sasabihin sa iyo, Margie.”
“Salamat na lang sa paalala, Vince.”
Napatango na lang si Vince.
Makalipas ang isang buwan, nakita ni Vince na may dumating kina Margie dakong alas tres ng hapon. Isang lalaki. Nakasakay sa taxi. Isang maleta lang ibinaba mula sa taxi. Mukhang OFW ang dumating.
Asawa na kaya ni Margie?
Nasa bahay kaya si Margie?
Wala kayang kasamang lalaki si Margie?
(Itutuloy)
- Latest
