Ang Babae sa Silong (70)

‘‘Pagkatapos mong mag-opisina, anong ginagawa mo, Dads?’’ tanong ni Gab.

“Umuuwi na.’’

“Hindi ka naghapi-hapi?’’

“Hindi.’’

“Kasi ‘yung ibang lalaki – gaya ng papa ko e umiinom ng alak o beer paglabas ng trabaho. ‘Yung iba nga raw ay nandun sa bar na may naghuhubad na babae. Hindi ka mahilig sa ganun?’’

“Hindi.’’

“E di, hindi ka umi­inom?’’

“Umiinom din pero hanggang dalawang beer lang.’’

“Ay ang bait mo pala Dads.’’

Nagtawa si Dado.

“Ba’t ka nagtawa Dads?’’

“Kasi pinanindigan mo na akong tawaging Dads, ha-ha-ha!’’

“Mas masarap pakinggan ang Dads.’’

“Sige na nga. Kung diyan ka masaya, ha-ha-ha!’’

“Teka, Dads, pag-uwi mo galing opis, anong ginagawa mo?’’

“Magluluto ng kaka­inin. Kung minsan, bumibili ako ng lutong pagkain sa canteen. Pagkatapos, manonood ng sine at pagkatapos, tulog na.’’

“Ganun araw-araw, Dads? Hindi ka nagsasawa?’’

“Hindi. Masaya nga ako sa ganung buhay.’’

‘‘Ganyan din ang gusto ko, Dads, kaya lang hindi talaga puwede.’’

Hindi na nagsalita si Dado. Alam niya na lalam­bot at maaring umiyak si Gab.

Maya-maya, kinuha ni Gab ang cell phone sa bulsa. May nag-text.

“Si Papa nasa baba. Sige Dads, salamat sa pagtitiyaga mo sa akin. Sa uulitin uli ha?’’

‘‘Basta ikaw Gab.’’

Nagmamadaling umalis na si Gab. Siguro may kailangan na naman ang papa niya.

Isang umaga, papasok sa opis si Dado. Nakasabay niya si Gab patungo sa sakayan ng jeepney sa España Blvd.

‘‘Next week, uuwi ako ng probinsiya Dads. Dadalawin ko si Mama at dadalhan ng pera.’’

“Puwedeng sumama Gab?’’

Tiningnan siya nang makahulugan ni Gab.

(Itutuloy)