Supporters ni FPRRD nisaulog sa iyang ika-80 nga birthday

CEBU, Philippines — Mga supporters ni kanhi presidente Rodrigo Duterte nagtapok aron saulogon ang ika-80 ka tuig nga adlaw’ng natawhan niini kagahapon, Marso 29.

Si Duterte kasamtangan nga nabilanggo sa International Criminal Court Detention Center didto sa The Hague sa Netherlands tungod sa kasong crime against humanity nga gipasaka sa mga kabanay sa mga napatay sa dugoong war on drugs atol sa iyang administrasyon.

Matud pa sa kapolisan, moabot 6,000 ang ilang napatay nga drug suspects atol sa war on drugs, apan ang human rights groups miingon nga sobra 30,000 ang gipatay ug ang uban niini mga inosente.

Sa Danao City, ang mga supporters ni Duterte gikan sa mga silingang lungsod nagtapok diha sa Boardwalk  Huwebes sa gabii sa Marso 27, 2025. 

Sadya ang panagtapok tungod sa mga banda nga nagtukad aron lingawon ang mga tawo. Si Danao City   Mayor  Ramonito Durano nga mitambong sa maong kalihokan uban sa iyang pamilya ang mipadangat sa iyang mensahe ug gisundan kini sa pag-apod-apod og cupcakes nga ilang giugbokan og kandila nga ilang gidagkotan ug nagdungan sa pagtayhop ug ilang gikantahan ug happy birthday ang nagsaulog sa iyang adlaw sa pagtimbaya sa kanhi presidente. Atol sa kalihokan dunay gipakatap nga kapolisan aron luwas ang mga nanambong. Decemay Padilla/IBM BANAT NEWS