‘Amoy’, ‘Asim’ tumanggap din ng confidential funds ni VP Sara’
MANILA, Philippines — Bukod sa pamilya Piattos, Dodong gangs, Jay Kamote, at Miggy Mango, tumanggap din umano ng confidential fund ni Vice President Sara Duterte sa Commission on Audit (COA) sina “Amoy” at “Asim”.
“Sa patuloy na pagsusuri ng Kongreso sa listahan ng mga nakatanggap ng confidential funds sa DepEd (Department of Education), may bagong grupo na naman—ang tinatawag nating ‘Team Amoy Asim’,” pagbubunyag ni House Deputy Majority Leader at La Union Rep. Paolo Ortega V.
Nadiskubre ang kuwestyunableng mga pangalan na sina “Amoy Liu”, “Fernan Amuy”, at “Joug De Asim”.
Sinabi ni Ortega na sina Liu, Amuy, at De Asim ay walang birth, marriage, o death record sa database ng Philippine Statistics Authority (PSA).
Una nang kinuwestyon kung totoong tao sina “Mary Grace Piattos”, “Renan Piatos”, “Pia Piatos-Lim”, “Xiaome Ocho”, “Jay Kamote”, “Miggy Mango”, at lima pa na may pangalang Dodong na nasa listahan ng mga nakatanggap ng confidential funds ng Office of the Vice President (OVP).
Mula sa 1,992 nakatanggap ng confidential funds sa OVP, sinabi ni Ortega na 1,322 ang walang birth records, 1,456 ang walang marriage records, at 1,593 ang walang death records.
- Latest
