Junior Altas paborito vs Junior Pirates
MANILA, Philippines — Makakatapat ng University of Perpetual Help System DALTA ang Lyceum of the Philippines University sa NCAA Season 100 juniors basketball tournament sa FilOil EcoOil Centre sa San Juan City.
Nakatakda ang bakbakan ng Junior Altas at Junior Pirates ngayong alas-4 ng hapon matapos ang upakan ng Mapua Red Robins at Arellano Braves sa alas-2 ng hapon.
Sa unang laro sa alas-8 ng umaga ay maglalaban ang nagdedepensang Letran Squires at Emilio Aguinaldo College Brigadiers kasunod ang laro ng San Beda Red Cubs at St. Benilde-La Salle Greenhills Greenies sa alas-10 ng umaga.
Magtutuos naman ang Jose Rizal Light Bombers at San Sebastian Staglets sa alas-12 ng tanghali sa ikatlong laro.
Tangan ang 3-1 record, hangad ng Junior Altas ni coach Joph Cleopas ang back-to-back wins para masolo ang liderato.
Kasosyo ng Junior Altas sa top spot ang Red Cubs at Brigadiers kasunod ang Squires, Braves, Greenies,Light Bombers at Red Robins na may magkakatulad na 2-2 marka.
May 1-3 baraha ang Staglets at kulelat ang Junior Pirates sa 0-4.
Galing ang Junior Altas sa 92-80 paggiba sa Braves habang yumukod ang Junior Pirates sa Staglets, 77-83, sa kanilang mga huling laro.
Muling sasandig si Cleopas kina 6-foot-7 Lebron Jhames Daep, Jan Roluna, Jericho Cristino, JD Pagulayan, Icee Callangan, Louie Ramirez, Aries Borja, Kelsey Baldoria, Kurt Velasquez at TJ Tabbuan.
- Latest
