Reklamo ni Rama vs Garcia sa OP, gibasura

CEBU, Philippines — Gibasura sa Office of the President ang hangyo ni suspended Cebu City Mayor Michael Rama nga ipaubos sa preventive suspension si Cebu Governor Gwendolyn Garcia kalabot sa kaso nga gipasaka sa mayor batok sa gobernador.

Sa kamandoan sa buhatan sa Presidente, wala kini nakitang merito aron paboran ang hangyo ni Rama nga suspensuhon si Garcia.

"After a preliminary evaluation of the complaint, this Office finds allegations of the same insufficient to warrant the issuance of the order prayed for," sumala sa Office of the President.

Ang maong kamandoan gi-post sa Sugbo News, ang news portal sa Probinsiya sa Sugbo pinaagi sa social media niini.

Niadtong Marso karong tuiga dihang gisang-at ni Rama ang kasong administratiba batok kang Garcia ngadto sa buhatan sa Presidente.

Ang kaso mahitungod kini sa pasangil nga pagpanghilabot ni Garcia sa konstruksyon sa Cebu Bus Rapid Transit (CBRT) nga proyekto.

Kini human si Garcia mipagawas og cease and desist order (CDO) niadtong Pebrero 2024 batok sa Chinese construction firm nga Hunan Road and Bridge Construction Group Co. Ltd., nga maoy nagtrabaho sa CBRT diha sa atubangang bahin sa Kapitolyo.

Ang rason ni Garcia, natabungan sa tukorong estraktura sa CBRT ang atubangang bahin sa Kapitolyo nga gikonsiderar nga national landmark ug protektado kini sa Heritage Law sa nasud.

Si Rama mipasangil kang Garcia nga usa ka matang sa abuse of authority, oppression, grave misconduct, ug nakalapas sa Code of Ethical Standards for Public Officials ug Anti-Graft and Corrupt Practices Act ang gihimo niini.

Matod ni Rama walay katungod si Garcia nga mag-apil apil sa transakyon sa dakbayan sa Sugbo sanglit usa kini ka highly-urbanized city nga ang operasyon walay kalabotan sa hurisdiksyon sa Probinsiya sa Sugbo.

Sa maong kamandoan sa OP, si Garcia gimandoan nga motubag sulod sa 15 ka adlaw gikan sa pagdawat sa maong order.

Si Rama kinsa nakadawat na sab sa kopya sa desisyon sa OP, nanghinaot nga adunay "transparency ug due process" sa iyang hangyo.

"Mayor Rama will continue to fight for the autonomy of Cebu City and defend it from encroachments. He remains committed to battling corruption and standing up for what is right and just" sumala sa opisyal nga pamahayag sa kampo ni Rama kagahapon Hunyo 9.

"We, Cebuanos, will fight for our right to keep MCWD corruption-free and responsive to the needs of consumers. We will insist on the right of Cebu City to demand that the CPA comply with our local laws and regulations, and we will continue the fight to ensure the timely completion of the CBRT" dugang pa niini. — /IBM (BANAT NEWS)