LSGH kampeon sa NCAA swimming

MANILA, Philippines — Humakot ang La Salle Green Hills (LSGH) ng kabuuang 12 ginto, 10 pilak at anim na tansong medalya upang matagumpay na madepensahan ang kampeonato sa boys’ juniors division ng NCAA Season 102 swimming competitions na ginanap sa Rizal Memorial Sports Complex sa Manila.

Bumandera sa kampanya ng LSGH tankers si Rafael Titus Sia na umani ng pitong ginto, isang pilak at tatlong bagong NCAA records para

masungkit ang Rookie of the Year at Most Valuable Player of the Year award.

Naitala ni Sia ang rekord sa 200m freestyle (1:57.46), 800m freestyle (8:46.19) at 1500m freestyle (16:56.81).

Hindi rin nagpahuli sina Kristian Yugo Cabana at Behrouz Mohammad ‘Madi’ Mojdeh na pambato ng Behrouz Elite Swimming Team na nag-ambag ng medalya para sa LSGH squad.

Hataw si Cabana ng apat na ginto, tatlong pilak at isang tansong medalya kabilang ang gold medal output sa 100m butterfly at 200m

butterfly.

Hindi naman nagpahuli si Mojdeh na kumana ng dalawang ginto, tatlong pilak at dalawang tansong medalya sa naturang four-day swimfest.

Bahagi si Mojdeh ng relay team na nakasungkit ng gintong medalya sa 4x50m medley at 4x100m medley. Nakakuha rin si Mojdeh ng pilak sa 200m breaststroke, 200m backstroke at 200m butterfly habang may tanso ito sa 400m freestyle at 400m Individual medley.

Nag-ambag din ng medalya ang iba pang miyembro ng LSGH swimming team na sina Gerald Esquivel (4 ginto at dalawang tanso), Gilbert Rodevic (2 ginto, 3 pilak at 1 tanso), at Rafael Ubiadas (2 ginto).

Nagbulsa si Esquivel ng ginto sa 50m freestyle, 50m butterfly, 4x50m freestyle at 4x100m freestyle, at tanso sa 100m freestyle at 100m

butterfly.

May ginto naman si Rodevic sa 4x50m medley at 4x100m medley, at pilak sa 50m breaststroke, 100m butterfly at 100m breaststroke, at tanso sa 200m butterfly, habang kasama si Ubiadas sa nakaginto sa 4x50m medley at 4x100m freestyle.

Ang LSGH swimming team ay hawak nina veteran coaches Evan Grabador, Uwy Vega at Princess Amodia.