Marquez pabor sa ‘super-fight’

CEBU, Philippines - Mikompisal si Mexican boxing legend Juan Manuel Marquez nga usa siya sa mga pabor sa katumanan sa ‘super-fight’ tali sa iyang karibal nga si Manny Pacquiao ug American superstar Floyd Mayweather Jr.

Si Marquez nagkanayon nga inay magukod og laing rematch batok kaniya, mas maayo pa alang ni Pacquiao nga sangkaon si Mayweather.

“I hope they make the fight between Manny Pacquiao and Floyd Mayweather to erase any doubts,” matud pa ni Marquez.

Si Marquez ang katapusang boksidor nga mipahamtang  ni Pacquiao og knockout nga kapildehan atol sa ilang ‘fourth fight’ niadtong miaging tuig didto sa Las Vegas.

Ang 40-anyos nga Mexican legend kinsa dugay nang mipadayag nga wala na siya'y interes nga sangkaon pag-usab si Pacquiao, nagkanayon nga daghan mga fans ang dugay nang naghandum sa away ug responsibilidad nila ni Pacquiao ug Mayweather nga tumanon kini.

Si Marquez miingon nga mutan-aw siya sa away, apan dili na mausab ang iyang baruganan nga dili na hatagan og kahigayunan si Pacquiao bisan pa og mudaog ang Filipino boxing superstar ni Mayweather. (BANAT NEWS)