Dayag ug wala’y gitagoan sa paghatag sa ganti nga salapi ngadto sa nakatug-an sa nahimutangan sa nahibiling Abu Sayyaf sa lalawigan sa Bohol. Transparent kini matud pa sa Central Command. Kun transparent man, nganong daghan man ang nangutana niini? Kun maghisgot ta og transparent, ang buot ipasabot niini nga dayag ug klaro, nga sa ato pa wala’y gitagoan ang Central Command sa ilang paghatag sa ganti nga salapi nga gisaad ni Presidente Rodrigo Duterte.
Kun transparent pa ang Central Command, nganong nagreklamo man ang habal-habal driver sa nadawat niyang P450 mil? Tag-usa ka milyon ka pesos man gud ang gisaad sa presidente sa kada Abu Sayyaf nga madakpan ug mapatay tungod sa kasayuran nga gitug-an. Kun transparent pa ang Central Command, nganong wala man nila pasudla ang mga sakop sa media ug gisekreto ra man ang paghatag sa ganti nga salapi.
Kun gipanalipdan sa Central Command ang kinabuhi ug seguridad sa ilang informant, gikinahanglan gyud diay nga dili pa-coveron ang mga sakop sa media? Ngano man diay og gipa-cover ang media ug gisultian nga confidential ang pagtunol sa ganti nga salapi. Dili man iresponsable ang mga sakop sa media. Dili man kini magpasagad lang og balita. Makamao man kini nga mosunod og protocol.
Kun wala gayu’y gitagoan ug gihimong binuang ang mga opisyal sa Central Command sa paghatag sa ganti nga salapi, ako silang gihagit sa paglad-lad sa ilang mga ebidensiya sa mga tawo nga ilang giapilan sa pagbahin sa salapi bisan lang sa ilang mga anino. Ako usab sila nga gihagit sa pagpakita sa kopya sa transmittal sa salapi nga magladlad sa tinuod nga kantidad nga ilang nadawat tungod kay may nadunggan ko nga P4 milyones gyud ang gipadala nga salapi sa Malakanyang segun sa gisaad sa presidente.
Kun mapakyas ang Central Command sa pagtubag sa akong hagit, maingon nato nga duna sila’y gihimong milagro.